नगर : जिल्हा परिषदेत सोमवारी झालेल्या सर्वसाधारण सभेत यंदा ४४ कोटी ३७ लाख २४ हजार ४२३ रुपयांचा अर्थसंकल्प सादर केला आहे. पंचायत समितीसह हा अर्थसंकल्प ४९ कोटी १९ लाख ७७ हजार पाचशे कोटी रुपयांचा आहे. यात यंदा कृषी व पशुसंवर्धन विभागासाठी पावणेपाच कोटी रुपयांची तरतूद केली आहे. 

जिल्हा परिषदेत सोमवारी अध्यक्ष शालिनीताई विखे पाटील यांच्या अध्यक्षतेखाली अर्थसंकल्पीय सर्व साधारण सभेत अर्थ व बांधकाम समितीचे सभापती कैलास वाकचौरे यांनी अर्थसंकल्प सादर केला. मुख्य कार्यकारी अधिकारी विश्वजित माने, अतिरिक्त मुख्य कार्यकारी अधिकारी जगन्नाथ भोर, उपाध्यक्ष राजश्री घुले, सभापती अजय फटांगरे, अनुराधा नागवडे, उमेश परहर, उपमुख्य कार्यकारी अधिकारी वासुदेव साळुंखे यांची प्रमुख उपस्थिती होती. 

जिल्हा परिषदेच्या यंदाच्या अर्थसंकल्पातील तरतुदीत काही बदल झाले आहेत. मयत विद्यार्थ्याच्या कुटुंबाला आर्थिक मदत, समितीचे दौरे, शाळा निर्लेखन, आत्महत्या केलेल्या शेतकऱ्याच्या कुटुंबाला मदत देण्यासाठी निधीची तरतूद केली आहे. कृषी व पशुसंवर्धनसाठी पावणेपाच कोटींसह शिक्षण विभागाला एक कोटी सतरा लाख, सार्वजनिक बांधकाम विभागाला अकरा कोटी, लघू पाटबंधारे विभागासाठी एक कोटी, ग्रामपंचायत विभागासाठी तीन कोटी, समाज कल्याणसाठी तीन कोटींची तरतूद केली आहे. दरम्यान आत्महत्या केलेल्या शेतकऱ्यांच्या कुटुंबाला प्रत्येकी पन्नास हजारांची मदत दिली जाते. मात्र अनेक आत्महत्या केलेल्या शेतकऱ्यांना शासनाच्या किचकट निकषामुळे मदतीपासून वंचित राहावे लागत आहे. 

त्यामुळे जिल्हा परिषदेच्या स्वःनिधीतून पैसे द्यायचे असतील तर आपल्या पातळीवर निकष ठरवून मदत करावी, अशी मागणी सुनील गडाख, राजेश परजणे, शरद नवले, सीताराम राऊत, संदेश कार्ले, हर्षदा काकडे, जालिंदर वाकचौरे, तुकाराम कातोरे यांच्यासह अन्य सदस्यांनी केली. कृषी समितीने निकषांवर निर्णय घ्यावा, असे शालिनीताई विखे पाटील यांनी सांगितले.