लातूर  : लातूर कृषी विभागांतर्गत पाच जिल्ह्यांतील खरीप पिकांची प्रस्तावित प्रथम नजरअंदाज उत्पादकता लातूर कृषी विभागाने जाहीर केली आहे. औरंगाबादेत नुकत्याच पार पडलेल्या विभागीय कृषी संशोधन, सल्लागार समितीच्या बैठकीत ही आकडेवारी ठेवण्यात आली. त्यामध्ये मुगाची हेक्‍टरी उत्पादकता ३ क्‍विंटल ६२ किलो तर उडदाची उत्पादकता ३ क्‍विंटल ९५ किलो दाखविली गेली आहे.

लातूर कृषी विभागाकडून समोर करण्यात आलेल्या प्रथम नजर अंदाज खरीप पिकांच्या उत्पादकतेत भाताची उत्पादकता हेक्‍टरी ४ क्‍विंटल २ किलो हेक्‍टरी दाखविली गेली आहे. २०१७-१८ मध्ये लातूर कृषी विभागातील पाच जिल्ह्यांत खरीप ज्वारीचे हेक्‍टरी ६ क्‍विंटल ७२ किलो उत्पादन झाले होते. त्या तुलनेत यंदा प्रथम नजरअंदाज उत्पादकता ६ क्‍विंटल ८६ किलो दाखविण्यात आली आहे. बाजरीचे गत खरिपात हेक्‍टरी ३ क्‍विंटल २९ किलो उत्पादन झाले होते. यंदा मात्र, त्यामध्ये २ क्‍विंटल ६३ किलोपर्यंत घट दाखविली गेली आहे. मकाचे उत्पादन गतवेळीच्या खरिपात हेक्‍टरी ७ क्‍विंटल २८ किलोपर्यंत झाले होते. यंदा मात्र त्यात थेट ३ क्‍विंटल ८३ किलोपर्यंतच उत्पादन दाखविले गेले आहे. तुरीचे गत खरीप हंगामात हेक्‍टरी १० क्‍विंटल १२ किलो हेक्‍टरी उत्पादन झाले होते. ते हेक्‍टरी दहा क्‍विंटलपर्यंत खाली येण्याचा नजरअंदाज वर्तविली गेला आहे.

उडदाचे गतवर्षी हेक्‍टरी २ क्‍विंटल ६३ किलो उत्पादन झाले होते. ते ३ क्‍विंटल ९५ किलो हेक्‍टरी तर मुगाचे गतवेळी २ क्‍विंटल ६१ किलो आलेले उत्पादन ३ क्‍विंटल ६२ किलो येण्याचा प्रथम नजरअंदाज वर्तविला गेला आहे. सोयाबीनचे गतवर्षीच्या खरिपात हेक्‍टरी ९ क्‍विंटल ४३ किलो उत्पादन आले होते. त्यामध्ये वाढ होऊन हेक्‍टरी १० क्‍विंटल ६४ किलो उत्पादन प्रस्तावित करण्यात आले आहे. तिळाची हेक्‍टरी १ क्‍विंटल ७२ किलो, भुईमुगाचे हेक्‍टरी ३ क्‍विंटल २२ किलो, सुर्यफूल हेक्‍टरी १ क्‍विंटल ४२ किलो, कपाशीचे हेक्‍टरी ३ क्‍विंटल ३६ किलो यंदाच्या खरिपाची प्रथम नजरअंदाज उत्पादकता स्पष्ट केली आहे.