अकोला  ः शहराच्या मध्य भागातून वाहणाऱ्या मोर्णा नदीला सध्या जलपर्णी अाणि अस्वच्छतेचे ग्रहण लागले असून, ही नदी स्वच्छ करण्यासाठी शनिवारी (ता.१३) हजारो अकोलेकर सरसावले. नदीला स्वच्छ करण्यासाठी जिल्हा प्रशासनाने पुढाकार घेत नागरिकांना सहभागी होण्याचे अावाहन केले होते. त्यानुसार या नदीच्या दोन्ही तिरांवर शनिवारी हजारो नागरिकांनी श्रमदानासाठी पुढाकार घेतला.

जिल्ह्याचे पालकमंत्री डॉ. रणजित पाटील, खासदार संजय धोत्रे, अामदार रणधीर सावरकर, जिल्हाधिकारी अास्तिककुमार पांडेय, महापालिका, पोलिस प्रशासन, वैद्यकीय क्षेत्र, सामाजिक संघटना, विद्यार्थी तसेच सर्वसामान्य नागरिक असे हजारो हात ‘मोर्णा’ नदीला स्वच्छ करण्यासाठी सरसावले होते.

सकाळी ८ वाजता मोर्णेच्या स्वच्छतेला प्रारंभ झाला. एकाच वेळी १४ ठिकाणी सुरवात झाली. जलकुंभी काढण्याचे काम सुरू झाले. मोर्णा नदी जलकुंभी व कचऱ्याने विद्रूप झाली आहे. तिच्या स्वच्छतेसाठी जिल्हाधिकाऱ्यांनी लोकसहभागातून नदीच्या स्वच्छतेचे काम हाती घेतले.

नदीच्या ठिकाणी सर्वांच्या सुरक्षेबरोबरच स्वच्छतेअंतर्गत करावयाच्या बाबींचे परिपूर्ण नियोजन करण्यात आले होते. मोर्णा नदी स्वच्छता मोहिमेसाठी जिल्हा प्रशासन व मनपा प्रशासनाने जिल्ह्यातील तहसीलदारांच्या नियंत्रणाखाली १४ स्वच्छता पथकांची स्थापना केली आहे. नदीतील जलकुंभी काढण्यासाठी अनुभवी कामगार व जेसीबीची मदत घेतली जात अाहे. त्यानंतर काठावरील जलकुंभी नागरिकांमार्फत ट्रॅक्टर व घंटागाडीत भरली जात अाहे.