अकोला : द्विदल वर्गीय पिकांवर अमरवेल तणाचा प्रादुर्भाव वाढत चालल्याने शेतकरी चिंतातूर बनत आहेत. त्याचा पिकाच्या उत्पादनाला थेट फटका बसण्याची स्थिती बनली आहे. प्रामुख्याने सोयाबीन, मूग, उडिद, तूर या पिकांवर ही वेली वाढताना दिसून येत आहे.

त्याचा प्रसार सरसकट रोखणे जिकिरीचे बनले आहे. अमरवेलीची वाढ प्रामुख्याने सोयाबीन, मूग, उडीद या पिकांवर अधिक होताना दिसून येत आहे. सध्या ही पिके शेंगाच्या अवस्थेत असून या वेलीचा विळखा वाढतच असल्याने अनेक शेतांमध्ये पीक या वेलीने गुंडाळलेले पहायला मिळते आहे. पावसाने उघडीप दिल्यानंतर शेतीतील कामे पुन्हा सुरू झाली आहेत. सोयाबीनचे क्षेत्र या भागात अधिक असून शेतकऱ्यांनी तणनाशकाद्वारे तण व्यवस्थापन केले आहे. परंतु, अमरवेलीचा यामुळे बंदोबस्त झालेला नाही. शेंगा परिपक्व होत असताना ही वेली फोफावत चालल्याने उत्पादनात घट येण्याची शक्यता आहे. अमरवेली परोपजीवी वनस्पती सोयाबीन, मूग, उडिद या पिकावर अमरवेलीचा प्रादुभार्व विदर्भात अधिक दिसून येत आहे. हे तण परोपजीवी समजले जाते. जगण्यासाठी योग्य अशा झाडावर ते अवलंबून राहते. ते ठरावीक वनस्पती, कुंपण, झाडांवर वाढते. ही वेल गुंडाळी करून दुसऱ्या वनस्पतींच्या खोड तसेच पानांवर पसरते.  दुसऱ्या झाडातील अन्नद्रव्ये शोषून घेते. यामुळे झाडाची वाढ खुंटते.