पुणे : राज्यात कमाल व किमान तापमानात सातत्याने वाढ होत आहे. फेब्रुवारी महिन्यातच काही ठिकाणी कमाल तापमान ३५ अंशांच्या पुढे, तर बहुतांशी ठिकाणी किमान तापमान १५ अंशाच्या पुढे गेले आहे. सोमवारी (ता. १७) सोलापूर येथे राज्यातील उच्चांकी ३६.३ अंश सेल्सिअस तापमानाची नोंद झाली. थंडीही गायब झाली असून, बुधवारपर्यंत (ता. १८) किमान तापमानात २ ते ३ अंशांची वाढ होण्याची शक्यता हवामान विभागाने वर्तविली आहे. निरभ्र आकाशामुळे राज्याच्या कमाल तापमानात मोठी वाढ झाली आहे. बहुतांशी ठिकाणी तापमान तिशीपार गेल्याने उन्हाचा चटका असह्य होत आहे. उत्तरेकडून थंड वारे न आल्याने यंदा गारठा कमीच आहे. दिवसाबरोबरच रात्रीही उकाडा वाढला आहे. पहाटेच्या वेळी काही ठिकाणी धुके पडत आहे. सोमवारी (ता.१७) निफाड व नागपूर येथे राज्यातील नीचांक १२.० अंश सेल्सिअस तापमान नोंदले गेले. राज्यात कमाल तापमान ३० ते ३६ अंश तर किमान तापमान १५ ते २० अंशांदरम्यान आहे.   सोमवारी (ता. १७) सकाळपर्यंतच्या २४ तासांमध्ये राज्यातील विविध ठिकाणचे कमाल व किमान (कंसात) तापमान, (अंश सेल्सिअसमध्ये) : पुणे ३३.६(१६.१), नगर -(१५.३), जळगाव ३४.०(१७.०), कोल्हापूर ३३.७(१९.६), महाबळेश्‍वर ३०.२(१७.५), मालेगाव ३३.६, नाशिक ३१.५(१५.९), निफाड ३०.०(१२.०), सांगली ३५.२(१८.४), सातारा ३४.१(१६.८), सोलापूर ३६.३(२०.२), अलिबाग - (२०.५), डहाणू ३१.२(२०.७), सांताक्रूझ ३२.६(१९.८), रत्नागिरी ३३.१(१९.६), औरंगाबाद ३२.८(१७.४), परभणी ३४.५(१६.४), नांदेड ३३.०(१५.०), अकोला ३४.६(१५.७), अमरावती  ३३.६(१६.६), बुलडाणा ३१.०(१७.४), चंद्रपूर ३३.५(१४.०), गोंदिया २९.४(१२.४), नागपूर ३२.१(१२.०), वर्धा  ३२.०(१५.६), यवतमाळ ३१.५(१७.०).