अकोला  ः खरीप हंगामात राबविल्या जात असलेल्या प्रधानमंत्री पीकविमा योजनेच्या अनुषंगाने बार्शीटाकळी तहसील कार्यालयात शुक्रवारी (ता. ११) तालुकास्तरीय तक्रार निवारण समितीची सभा घेण्यात आली.  सभेच्या सुरवातीला योजनेबद्दल तसेच तक्रार निवारण समितीचे कार्याबाबत समितीचे सदस्य सचिव तथा तालुका कृषी अधिकारी दीपक तायडे यांनी माहिती दिली. अमोल पातुर्डे यांनी वैयक्तिक नुकसान भरपाईकरिता एकूण प्राप्त तक्रारींचे वाचन करून सदर तक्रारी विमा कंपनी प्रतिनिधींकडे हस्तांतरित करण्यात आल्या. प्राप्त तक्रारींवर तत्काळ कार्यवाही करणार असल्याचे यावेळी विमा प्रतिनिधीने सांगितले. महादेव गावंडे, अनिल ढोरे, गजानन खेडकर यांनी पिक कापणी प्रयोगाबद्दल तसेच तालुक्यामध्ये आयोजित गावनिहाय पीक कापणी प्रयोगाबाबत सभागृहात माहिती दिली. या बैठकीला शेतकरी प्रतिनिधी गजानन वाघमारे, गजानन आखरे, गणेश नानोटे, गजानन म्हैसने, बँक प्रतिनिधी श्री. निळखन, रवींद्र महल्ले आदी उपस्थित होते. या सभेचे सूत्रसंचालन करून कृषी सहायक गजानन खेडकर यांनी आभार मानले.