परभणी : जिल्ह्यातील सायखेडा (ता. वसमत) येथील महाराष्ट्र शुगर्स साखर कारखान्याकडील शेअर्सची रक्कम देण्यात यावी या मागणीसाठी शेतकऱ्यांनी बुधवारी (ता. २७) जिल्हाधिकारी कार्यालयात ठिय्या आंदोलन केले.

महाराष्ट्र शुगर्स या साखर कारखान्याने परभणी जिल्ह्यातील, तसेच अन्य जिल्ह्यांतील शेतकऱ्यांकडून प्रति सभासद २५ हजार रुपये शेअर्स घेतलेले आहेत. या कारखान्याकडे ऊस देयके थकीत आहेत. दरम्यानच्या काळात या कारखान्याची विक्री झाली आहे. त्यामुळे महाराष्ट्र शुगर्स साखर कारखान्याकडील शेअर्सची रक्कम शेतकऱ्यांना देण्यात यावी, अशी मागणी शेतकरी सुकाणू समितीतर्फे डिसेंबर महिन्यात जिल्हा प्रशासनाकडे करण्यात आली. परंतु या मागणीच्या अनुषंगाने कार्यवाही करण्यात न आल्यामुळे संतप्त झालेल्या शेतकऱ्यांनी कॉ. विलास बाबर, भारत वाघ, गोविंद पवार यांच्या नेतृत्वाखालील ठिय्या आंदोलन केले.