सोलापूर  ः राजीव गांधी यांच्यानंतर ३० वर्षांनी देशाने एका व्यक्तीला बहुमत दिले. देशातल्या लोकांनी एवढे प्रेम केले; पण तुम्ही काय दिले, केवळ थापा मारल्या, फसवणूक, पिळवणूक आणि आरक्षणाच्या नावाखाली भांडणे लावली. शेतकऱ्याला तर पार देशोधडीला लावले. शेतकऱ्यांच्या आत्महत्या अजून थांबलेल्या नाहीत. मुख्यमंत्री देवेंद्र फडणवीस म्हणतात, 'आम्ही १ लाख २० हजार विहिरी खोदल्या. मग त्या आहेत तरी कुठे, कुठल्या विहिरीवर मुख्यमंत्र्यांनी जाऊन पाणी भरले? असा सवाल महाराष्ट्र नवनिर्माण सेनेचे प्रमुख राज ठाकरे यांनी भाजप-शिवसेना सरकारला विचारला. माझ्या सभांच्या खर्चाचा हिशेब मोजता, आधी तुमच्या पाच वर्षांच्या थापा मोजा, असा टोलाही त्यांनी लगावला. 

सोलापुरातील कर्णिकनगरमधील फुटबॅाल मैदानावर सोमवारी (ता. १५) सभा झाली. मनसेचे नेते संदीप देशपांडे, अविनाश अभ्यंकर, जिल्हा संघटक दिलीप धोत्रे, महिला जिल्हाध्यक्ष सुप्रिया महिंद्रकर, नाशिकचे नितीन भोसले आदी या वेळी उपस्थित होते. या सभेला मनसेशिवाय काँग्रेस- राष्ट्रवादी काँग्रेसचे अनेक नेते, कार्यकर्तेही मोठया संख्येने उपस्थित होते. देशातील पहिले डिजिटल व्हिलेज म्हणून जाहिरात करण्यात आलेल्या हरिसाल (अमरावती) येथील येथील कृपाल या तरुणाला ठाकरे यांनी या वेळी व्यासपीठावर बोलावले. या तरुणाने जाहिरातीत मॉडेल म्हणून काम केले होते. सध्या तो नोकरीच्या शोधात फिरतो आहे, याकडे त्यांनी लक्ष वेधले आणि सांगा हाच का डिजिटल इंडिया आणि या बेरोजगारीचं काय, असा प्रश्न केला.