बाजारभोगाव, जि. कोल्हापूर : जांभळी नदीवरील खापणेवाडी-गुरववाडी बंधाऱ्याच्या दुरुस्तीसाठी लाखो रुपयांचा निधी खर्चूनही बांधकामातून मोठ्या प्रमाणात गळती सुरू आहे. त्यामुळे शेतकरी वर्गातून तीव्र संताप व्यक्त होत आहे. या कामाची चौकशी करण्याची मागणी होत आहे.

कासारी प्रकल्पाअंतर्गत सुमारे ३५ वर्षांपूर्वी झालेला पडसाळी (ता. पन्हाळा) येथील लघुपाटबंधारे तलाव हा जांभळी नदीच्या खोऱ्यातील शेतीसाठी वरदान ठरला आहे. सिंचन व वाहतूक अशा दुहेरी हेतूने जांभळी नदीवर ठिकठिकाणी कोल्हापूर पद्धतीचे बंधारे बांधले आहेत. तथापि, पाच-सहा वर्षांपासून बंधाऱ्यांना मोठ्या प्रमाणात गळती लागली. त्यांच्या डागडुजीसाठीचा रेटा वाढल्याने गतवर्षी शासनाकडून निधी मिळताच दुरुस्ती करण्यात आली. बंधाऱ्यांची गळती थांबवण्यासाठी गुरववाडीकडील बाजूला नव्या बांधकामासह अंतर्गत कामे करण्यात आली. 

दरम्यान, दुरुस्तीनंतर यंदा बंधाऱ्यात पाणीसाठा केल्यानंतर पुन्हा गळती लागल्याचे दिसत आहे. दुरुस्तीनंतरच्या ही अवस्था असल्याने कामाच्या दर्जाबाबत साशंकता व्यक्त होत आहे. कोल्हापूर : जांभळी नदीवरील खापणेवाडी-गुरववाडी बंधाऱ्याच्या दुरुस्तीसाठी लाखो रुपयांचा निधी खर्चूनही बांधकामातून मोठ्या प्रमाणात गळती सुरू आहे.