कोल्हापूर : जिल्ह्यात महाराष्ट्रीयन देशी (महाराष्ट्र) बेंदूर उत्साहात साजरा करण्यात आला. पश्‍चिम महाराष्ट्रातील अनेक जिल्ह्यांत देशी बेंदूर साजरा केला जातो. बेंदरानिमित्त ठिकाठिकाणी मिरवणुका काढण्यात आल्या. अनेक पानवठ्यांवर जनावरांची स्वच्छता करण्यासाठी सकाळपासून गर्दी दिसून आली.

बैलांना अंघोळ घातल्यानंतर शिंगे रंगवून आकर्षक रंगरंगोटी केल्यानंतर घरातील बैल, म्हैशीसह अन्य जनावरांना पोळ्यांचा नैवैद्य दाखवून जनावरांप्रती कृतज्ञना व्यक्त करण्यात आली. सायंकाळी विशेष करून जिल्ह्याच्या पश्‍चिम भागात कर तोडण्याचे कार्यक्रम झाले. देशी बेंदरानिमित्त गडहिंग्लज येथे आज (गुरुवारी) सदृढ बैलजोडी स्पधेचे आयोजन केले आहे. या स्पर्धेत पहिल्या तीन बैलजोड्यांना अनुक्रमे २० हजार, १५ हजार व १० हजार रुपयांची बक्षिसे उत्तेजनार्थ येणाऱ्या बैलजोड्यांनाही अनेक बक्षिसे देण्यात येणार आहे. बिन दाती, दाती आणि बैलजोडी या गटांत स्पर्धा होतील. शिवाजी चौक मित्र मंडळाच्या वतीने या स्पर्धा होणार आहेत.