कोल्हापूर : येथील कोल्हापूर कृषी महाविद्यालयाच्या वतीने विद्यार्थ्यांचे शैक्षणिक नुकसान होऊ नये यासाठी सोशल मिडियाच्या माध्यमातून ऑनलाइन क्लासेस घेण्यात येत आहेत. याला विद्यार्थ्यांचाही चांगला प्रतिसाद मिळत आहे.

कोरोनामुळे सर्व शैक्षणिक बाबी ठप्प असल्याने विद्यार्थ्यांचे शैक्षणिक कामकाजही बंद आहे. विद्यार्थी आपापल्या गावी परतले असले, तरी सध्या वर्ग बंद असल्याने त्यांचे क्‍लासेसचे कामकाज ठप्प झाले आहे. यातून पर्याय म्हणून ‘ॲप’च्या माध्यमातून विद्यार्थ्यांचे ऑनलाइन क्लासेस घेण्यात येत आहेत.

एकाच वेळी ऐंशी विद्यार्थी ऑनलाइन वर्गाचा लाभ याचा लाभ घेऊ शकत आहेत. दुसरे, चौथे आणि सहाव्या सत्राचे वर्ग अशा पद्धतीने घेण्यात येत आहेत. जिथे शिक्षक असतील तेथून ‘व्हॉटसअप किंवा झूम’ या समाज माध्यतातून ‘कॉन्फरस मिटींग’ घेऊन सेमिनार, वेबीनार द्वारे ऑनलाइन लेक्‍चर घेतले जाते. ज्यांच्याकडे स्मार्ट फोन नाहीत त्यांना त्यांच्या वर्गातील मुले फोन द्वारे सांगतात.

विविध विभागाच्या पोस्ट ग्रॅज्युएशनचे काम अशा पद्धतीने सुरू आहे. सेमिनार देणे आणि घेणे ऑनलाइन सुरू आहेत. सोशल मिडियाच्या माध्यमातून जेवढा संपर्क साधता येईल तितका साधून शैक्षणिक कामकाज सुरू ठेवण्यात येत असल्याचे कृषी महाविद्यालय प्रशासनाने सांगितले. महाविद्यालयाचे प्राचार्य डॉ. प्रमोद रसाळ यांच्या मार्गदर्शनाखाली या सुविधा द्वारे वर्ग सुरू आहेत.

कोरोनाचा प्रादुर्भाव रोखण्यासाठी सर्व शिक्षण संस्था बंद आहेत. शासनाने मुलांचे हॉस्टेलही विलीनीकरणासाठी ताब्यात घेतले आहे. शासनाला यासाठीही सहकार्य करण्यात येत असल्याचे महाविद्यालयाच्या वतीने सांगण्यात आले.