सांगली : पावसाने दिलेली हुलकावणी, आटलेल्या तलावामुळे कवठेमहंकाळ तालुक्‍यातील शेतकरी नैसर्गिक संकटात आहेत. ११ तलावांपैकी तीन तलाव कोरडे, तर दोन तलावांत मृतसंचय पाणीसाठा आहे. मात्र, या तालुक्‍यात टेंभू उपसा सिंचन योजनचे पाणी आले आहे. कामे अपूर्ण असल्याने या योजनेचे पाणी शेतकऱ्यांपर्यंत पोचत नाही. यामुळे शेतकरी चिंतातूर आहे.

कवठेमहांकाळ तालुक्‍यातील दुष्काळ दूर करण्यासाठी टेंभू आणि म्हैसाळ उपसा सिंचन योजनचे पाणी दिले जाते. मात्र, टेंभू योजनेचे काम पूर्ण झाले नाही. त्यामुळे या योजनेचा लाभ येथील शेतकऱ्यांना होत नाही.

तालुक्‍याला सरासरी ४०० मिलिमीटर वार्षिक पावसाची गरज असते. यंदा केळ २८६.९० मिलिमीटर पाऊस झाला. यामुळे खरीप हंगामा वाया गेला. रब्बी हंगामही वाया जाण्याची भीती शेतकऱ्यांना आहे. पिण्याच्या पाण्यासह जनावरांना टॅंकरने पाणी द्यावे, अशी मागणी होत आहे. मात्र, याकडे जिल्हा प्रशासनाचे दुर्लक्ष आहे. त्यातच वाघोली प्रादेशिक योजना बंद पडली आहे.

तालुक्‍यातील तीन तलाव कोरडे आहेत. एका तलावात मृतसंचय, तर रायेवाडी तलाव सीलखाली आहे. या तलावातील पाणी वापरता येत नाही. पाच तलावांत ११६.३१ दशलक्ष घनफूट पाणीसाठा शिल्लक आहे. मात्र, तो केवळ पंधरा ते वीस दिवस पुरेल. हा पाणीसाठा संपुष्टात आल्यानंतर पाण्याची सोय कशी करायची, असा प्रश्‍न शेतकऱ्यासमोर आहे.

तालुक्‍यातीतल अकरा गावांची टॅंकरची मागणी आहे. यामध्ये आगळगाव, केरेवाडी, जाखापूर, लोणारवाडी, चुडेखिंडी, अलकूड (एम), रांजणी, वाघोली, घाटनांद्रे, कुंडलापूर, ढालगाव या गावांचा समावेश आहे.

तालुक्‍यातील पावसाची आकडेवारी