चेन्नई ः तमिळनाडूतील जल्लीकट्टू या लोकप्रिय क्रीडा स्पर्धांच्या आयोजनाला राज्य सरकारने सशर्त मान्यता दिली आहे. कोरोनाच्या नियमावलीचे पालन करून पुढील महिन्यामध्ये या स्पर्धांचे आयोजन केले जावे, असे राज्य सरकारने म्हटले आहे.

या स्पर्धेमध्ये केवळ तीनशे संघांनाच सहभागी होता येणार असून अन्य क्रीडा प्रकारासाठी ही मर्यादा दीडशे एवढी ठेवण्यात आली आहे. दरम्यान या क्रीडा स्पर्धा पाहण्यासाठी येणाऱ्या प्रेक्षकांची थर्मल स्कॅनिंग चाचणी घेण्यात येईल. मास्क घालण्याबरोबरच त्यांनी सोशल डिस्टन्सिंगचे देखील पालन करावे लागेल असे सरकारकडून प्रसिद्ध करण्यात आलेल्या निवेदनात नमूद करण्यात आले आहे.

या स्पर्धांमध्ये सहभागी होणाऱ्या संघांना कोरोना निगेटिव्हची प्रमाणपत्रे सादर करणे बंधनकारक करण्यात आले आहे. यासाठी त्यांना सरकारी प्रयोगशाळांमध्येच कोरोनाच्या चाचण्या घ्याव्या लागणार आहेत.