जळगाव  ः महाविकास आघाडीने जाहीर केलेली कर्जमुक्ती योजना अंमलबजावणीला अद्याप सुरुवात झालेली नाही. सहकारी बॅंकांसह राष्ट्रीयकृत बॅंकांकडून शेतकऱ्यांच्या आधार संलग्नित असलेल्या खात्यांची माहिती मागविण्यात आली आहे. जिल्ह्यात राष्ट्रीयकृत बॅंकांमध्ये ३२१ खाती व जिल्हा बॅंकेची ६५ खाती आधाराविना असल्याची माहिती सूत्रांनी दिली. आपली कर्जखाती आधारशी संलग्नित करून माहिती पाठविल्याशिवाय शेतकऱ्यांना कर्जमुक्तीचा लाभ मिळणार नाही. यामुळे आपली खाती आधारशी संलग्न करण्यासाठी शेतकरी बॅंकांमध्ये चकरा मारीत आहेत. जळगाव जिल्हा बॅंकेने ज्यांची खाती आधारशी संलग्न नाहीत, त्या शेतकऱ्यांची यादी संबंधित विभाग कार्यालयात लावली आहे. गटसचिवांचे आंदोलन मध्यंतरी सुरू असल्याने हे काम रखडले होते.  परंतु, नंतर हे आंदोलन मागे घेतल्यानंतर गटसचिवांनी आधारशी कर्जखाते संलग्न नसलेल्या शेतकऱ्यांची माहिती घेऊन संबंधित शेतकऱ्यांचे आधार क्रमांक मागवून घेतले. सध्या कर्जमाफीसाठी पात्र शेतकऱ्यांची यादी गटसचिवांसह बॅंकांमध्ये तयार केली जात आहे.  जिल्हा बॅंकेने जशी कार्यवाही हाती घेतली, तशी कार्यवाही मात्र राष्ट्रीयीकृत बॅंकांमध्ये सुरू नाही. संबंधित बॅंकेतील कृषी अधिकाऱ्याकडे याबाबतची जबाबदारी दिली आहे. या अधिकाऱ्याकडे कामाचा भार अधिक असल्याने कामात खोडा येत आहे. आधार क्रमांक स्वीकारण्यासाठी सकाळची वेळ काही बॅंकांनी दिली आहे. ग्रामीण भागातील शाखांमध्येही अशीच स्थिती असल्याने शेतकऱ्यांना दोन ते तीनदा बॅंकेत आधार संलग्न करण्यासाठी चकरा माराव्या लागत आहेत.