नगर ः पंतप्रधान पारितोषिकासाठी सादर केलेल्या कापूस पिकावरील गुलाबी बोंड अळी व्यवस्थापन मोहीम प्रस्तावाच्या मूल्यमापनाबाबत केंद्र सरकारच्या वतीने उपसचिव एस. पी. पंत व डॉ. जी. प्रसाद यांनी नगर जिल्ह्याचा अभ्यास दौरा केला. 

शासकीय विश्रामगृहात त्यांना जिल्हा अधीक्षक कृषी अधिकारी पंडित लोणारे यांनी बोंड अळीवरील उपाययोजनेसंदर्भात माहिती दिली. या प्रसंगी उपविभागीय कृषी अधिकारी सुधाकर बोराळे, संजय काचोळे उपस्थित होते. 

राज्यात २०१८-१९मध्ये राबविण्यात आलेल्या कापूस पिकावरील गुलाबी बोंड अळी व्यवस्थापन मोहिमेमुळे गुलाबी बोंड अळीचे नियंत्रण करण्यास मदत झाली आहे. प्रशासनातील उत्कृष्ट कामासाठी केंद्र सरकारमार्फत देण्यात येत असलेल्या पंतप्रधान पारितोषिक २०१९ करिता गुलाबी बोंड अळी व्यवस्थापन मोहिमेचा प्रस्ताव सादर करण्यात आला आहे. केंद्र सरकारमार्फत या प्रस्तावाची छाननी होऊन तिसऱ्या टप्प्यासाठी प्रकल्पाची निवड झाली आहे. मांडवे, कोल्हार येथील शेतकऱ्यांशी चर्चा करून या पथकाने पाहणी केली.