पुणे  : पंढरपूरच्या आषाढी वारीसाठी पुण्यातून संत ज्ञानेश्‍वर महाराज आणि संत तुकाराम महाराज, संत सोपानकाका महाराज पालखी सोहळ्यामध्ये राज्यभरातून लाखो वारकरी सहभागी होत असतात. वारकऱ्यांना केंद्रबिंदू मानून वारीसंदर्भात करण्यात येत असलेल्या उपाययोजनांमध्ये ताळमेळ राहण्यासाठी स्वतंत्र कक्षाची स्थापना करण्यात आली आहे.

पुण्यातून प्रस्थान झाल्यानंतर या पालख्या सातारा, सोलापूर जिल्ह्यातून मार्गक्रमण करत पंढरपूर येथे जाणार आहेत. या पालख्यांसाठी व वारकऱ्यांसाठी अत्यावश्‍यक सुविधा उपलब्ध करून देण्यासाठी उपजिल्हाधिकारी तथा विशेष भूसंपादन अधिकारी उदय भोसले यांची समन्वयक अधिकारी म्हणून नियुक्ती करण्यात आली आहे.

पालखी सोहळ्यासाठी स्वतंत्र कक्षामध्ये तीन तहसीलदार व नायब तहसीलदार तसेच अन्य कर्मचाऱ्यांचा समावेश आहे. या समन्वय कक्षाशी संपर्क साधता यावा, यासाठी ०२०-२६१२३३७१ हा दूरध्वनी क्रमांक उपलब्ध करून देण्यात आला आहे. वारीसंबधी माहितीसाठी नागरिकांनी या दूरध्वनी क्रमांकाचा वापर करावा, असे आवाहन समन्वय अधिकारी उपजिल्हाधिकारी उदय भोसले यांनी केले आहे.