औरंगाबाद ः मराठवाड्यातील ८७९ मोठ्या, मध्यम व लघू प्रकल्पांसह बंधाऱ्यामधील उपयुक्त पाणीसाठ्यात किंचित वाढ झाली आहे. ११ जूनअखेर २९ टक्क्यांवरील उपयुक्त पाणी १८ जूनअखेर ३१ टक्क्यांवर पोचले आहे, अशी माहिती जलसंपदा विभागाच्या सूत्रांनी दिली.

मराठवाड्यात सुरवातीला अनेक भागात दमदार, जोरदार हजेरी लावणाऱ्या पावसामुळे काही प्रकल्पांतील पाणीसाठ्यात किंचित वाढ झाली आहे. मात्र पुन्हा एकदा पावसाने ओढ दिली. त्यामुळे प्रकल्पांमध्ये पाणीसाठा वाढण्यास खंड पडला आहे.

११ जूनअखेर मराठवाड्यातील ११ मोठ्या प्रकल्पांत ३८ टक्के उपयुक्त पाणीसाठा होता. त्यापाठोपाठ मध्यम ७५ प्रकल्पांत २० टक्के, लघू ७५३ प्रकल्पांत ११ टक्के, तर गोदावरी नदीवरील १५ बंधाऱ्यांत २६ टक्के व तेरणा, मांजरा, रेना नदीवरील २५ बंधाऱ्यांत ६ टक्के उपयुक्त पाणी शिल्लक होते. 

१८ जूनअखेर मोठ्या ११ प्रकल्पांत ३९ टक्के , मध्यम ७५ प्रकल्पांत २१ टक्के, लघु ७५३ प्रकल्पांत १२ टक्के, गोदावरी नदीवरील १५ बंधाऱ्यांत ३४ टक्के, तर तेरणा, मांजरा, रेना नदीवरील २५ बंधाऱ्यांत ६.२ टक्के उपयुक्त पाणी होते. ११ जूनअखेरपर्यंत मराठवाड्यातील एका मध्यम प्रकल्पासह ६३ लघू प्रकल्प कोरडेठाक होते. 

२९३ लघू प्रकल्पांतील पाणी जोत्याखाली

अठरा जूनअखेरपर्यंत मात्र कोरड्या पडलेल्या लघू प्रकल्पांची संख्या ९ ने घटून ५४ वर आली होती. तर पाणीसाठा जोत्याखाली गेलेल्या प्रकल्पांची संख्या ३ ने घटून ३०६ वर आली होती. १८ जूनअखेर जोत्याखाली पाणीसाठा असलेल्या प्रकल्पांमध्ये मध्यम १३, तर २९३ लघू प्रकल्पांचा समावेश होता, अशी माहिती जलसंपदा विभागाच्या वतीने देण्यात आली.