जळगाव ः गेल्या तीन महिन्यांपासून कोरोनामुळे लॉकडाउनचा मोठा फटका बसला आहे. अनलॉक सुरू असूनही अद्याप आधार नोंदणी केंद्र बंद असल्याने शेतकऱ्यांसह बॅंक ग्राहकांची गैरसोय होत आहे.

अनेकांचे आधार कार्ड नोंदणी अपडेट नसल्याने गरजूंना अनेक अडचणींना सामोरे जावे लागत आहे. जिल्ह्यात आधार नोंदणी केंद्रे सुरू करण्याची मागणी नागरिकांकडून केली जात आहे.

मध्यंतरी या बाबत काही दिवसांपूर्वी प्रशासनाला केंद्रचालकांनी आधार नोंदणी सुरू करण्याबाबत निवेदन दिले होते. परंतु कार्यवाही झालेली नाही. जिल्ह्यात अनेक आधार नोंदणी केंद्रातील चालकांना किटसह इतर साहित्य देखील पुरविण्यात आले आहे. मात्र, जिल्हा प्रशासनाकडून अद्याप हिरवा कंदील मिळत नसल्याने आधार नोंदणी पासून अनेक जण वंचित आहेत. एका तालुक्‍यात फक्त तीन ते चार केंद्रे सुरू आहेत. ग्रामीण भागातील काम तर ठप्पच आहे. आधार नोंदणी केंद्र नोंदणीस नियमांचे पालन करून सुरू करण्याची परवानगी द्यावी, अशी मागणीही नागरिकांकडून केली जात आहे.

केंद्र सरकारने सर्वसामान्य नागरिकांना दिलासा मिळावा म्हणून चार वर्षापूर्वी जनधन खाते सुरू केले होते. झिरो बॅलन्सच्या खात्यात अनेकांनी व्यवहार सुरळीत केले. काहींच्या खात्याशी आधार अपडेट नसल्याने खात्याशी अनेक बॅंक ग्राहकांची पैसे काढण्यासाठी समस्या निर्माण होत आहे.

आधार नोंदणीत जन्मतारीख अपूर्ण, चुकीचे व अपूर्ण नाव, मराठी व इंग्रजी नावात स्पेलिंगमध्ये बदल, मोबाईल नंबर लिंक नसणे यामुळे थम ठेवून पैसे काढणे अडचणीचे झाले आहे. विविध तालुक्‍यांच्या ठिकाणासह ग्रामीण भागात आधारसंबंधी सेवा देणारी केंद्रे वाढविण्याची गरज आहे. कारण अंगणवाडी, शाळा, शेतकरी सन्मान योजना, बॅंक लिकिंग खाते उघडणे व इतर शासकीय कामाकरिता आधार कार्ड  गरजेचे, ते अद्ययावत असावे लागते.