परभणी : जिल्ह्यात उद्भवलेल्या दुष्काळी परिस्थितीमुळे चारा उत्पादनात मोठी घट येणार आहे. येत्या काळात चाराटंचाईची समस्या  गंभीर होणार आहे. ही बाब विचारात घेऊन  गतवर्षीचा ज्वारीचा कडबा शिल्लक असलेले शेतकरी चारा साठवून ठेवत आहेत. त्यामुळे बाजारातील कडब्याची आवक कमी झाली आहे. परिणामी बाजारातील चारा-वैरणीचे दर आतापासूनच वाढले आहेत. सप्टेंबर महिन्याच्या तुलनेत रब्बी ज्वारीच्या कडबा पेंढ्याच्या प्रतिशेकडा दरात ८०० ते १००० रुपयांनी वाढ झाली असून, त्याचा दर ३६०० ते चार हजारांवर पोचला आहे.

रब्बी ज्वारीच्या क्षेत्रात मोठी घट झाली आहे. पाण्याअभावी अन्य चारापिकांचे क्षेत्रदेखील घटले आहे. मंगळवारी (ता. १३) ऊस वाढ्याचे दर प्रतिशेकडा ५०० ते ६०० रुपये, तर उसाच्या मोळीचे दर प्रतिशेकडा २००० ते २२०० रुपये होते. वाढीच्या आणि परिपक्वतेच्या अवस्थेत पावसाचा दीर्घ खंड पडल्यामुळे कडबा तसेच धान्य उत्पादनात मोठी घट आली आहे. त्यामुळे बाजारातील खरीप ज्वारीच्या (हायब्रिड) कडब्याची आवक कमी असून, कडब्याच्या पेंढ्याचे दर प्रतिशेकडा २००० ते २५०० रुपये पर्यंत पोचले आहेत.

नांदेड जिल्ह्यातून आलेल्या पिवळी ज्वारीच्या कडब्याचे दर प्रतिशेकडा ३००० ते ३३०० रुपयांपर्यंत पोचले आहेत. मक्याच्या पेंढ्याचे दर प्रतिशेकडा ७०० ते १२०० रुपये आहेत.