पुणे : बंगालच्या उपसागरात तयार झालेल्या गुलाब चक्रीवादळ महाराष्ट्रातून गुजरात राज्यात पोहोचली आहे. आज (ता. ३०) ही प्रणाली पुन्हा तीव्र होणार आहे. तर उद्या (ता. १) अरबी समुद्रात चक्रीवादळाची निर्मिती होण्याचे संकेत आहेत. ही प्रणाली पश्‍चिमेकडे सरकून जाणाऱ्या या प्रणालीमुळे महाराष्ट्र आणि गुजरातच्या किनाऱ्यालगत अरबी समुद्रात जोरदार वाऱ्यासह उंच लाटा उसळण्याचा इशारा देण्यात आला आहे. 

बंगालच्या उपसागरात तयार झालेले गुलाब चक्रीवादळ रविवारी (ता. २६) आंध्र प्रदेश आणि ओडिशाच्या किनाऱ्यावर धडकले. हे चक्रीवादळ आंध्र प्रदेश, तेलंगाणा, महाराष्ट्राच्या मराठवाडा, उत्तर महाराष्ट्रातून गुजरातकडे निघून गेले. बुधवारी (ता. २९) सकाळी ठळक कमी दाबाचे क्षेत्र असलेली प्रणाली दक्षिण गुजरात आणि खंबातच्या आखातामध्ये सक्रिय होती. आज (ता. ३०) अरबी समुद्राकडे गेल्यानंतर ही प्रणाली पुन्हा तीव्र होण्याचे संकेत आहेत.

अरबी समुद्रातील प्रणालीमुळे दोन दिवस उंच लाटा उसळणार असून, ताशी ५५ ते ६५ किलोमीटर वेगाने वारे वाहण्याची शक्यता आहे. त्यामुळे मासेमारीसाठी समुद्रात न जाण्याचा इशारा देण्यात आला आहे. आज (ता. ३०) गुजरात आणि उत्तर कोकणात तुरळक ठिकाणी जोरदार पावसाची शक्यता वर्तविण्यात आली आहे. त्यानंतर ही प्रणाली भारतीय किनाऱ्यापासून दूर पाकिस्तान आणि मकरान किनाऱ्याकडे जाणार असल्याने महाराष्ट्राला या प्रणालीचा प्रभाव जाणवणार नाही.