औरंगाबाद : वर्षभरापासून गांडूळ खताचे उत्पादन व गांडुळांची संख्या वाढविण्याचा उपक्रम येथील शकुंतला देसरडा यांनी हाती घेतला आहे. परसबागेतील प्रकल्पात जवळपास दोनशे किलो गांडूळ निर्माण केल्यानंतर आता ते शेतकऱ्यांना मोफत देण्याचा संकल्प त्यांनी केला आहे. याद्वारे गांडूळाची संख्या वाढीतून खत उत्पादनाचा ध्यास त्यांनी घेतला आहे. 

सिडको एन. ४ मधील एमआयटी हॉस्पिटलजवळील निवास स्थानाच्या परसबागेतील प्रकल्पातच देसरडा गांडुळाची निर्मिती करतात. त्यापासून गांडूळ खताचे उत्पादन घेतात. याची सुरवात करण्यासाठी त्यांनी जवळपास एक किलो 'एसोनिया फेटीडा' जातीचे गांडूळ हैदराबादवरून आणले होते. त्यांच्या खाद्यासाठी त्यांनी शेजारी कुटुंबीयांकडून ओला कचरा गोळा करण्यास सुरवात केली. तो कुजल्यानंतर त्याचा गांडुळाचे खाद्य म्हणून वापर करण्यासाठी परस बागेतील प्रकल्पांतर्गत बेडवर टाकण्याचे तंत्र त्यांनी अवलंबिले.

या पद्धतीने परसबागेत गांडूळनिर्मितीच्या कार्याला मैत्रिणींनीही प्रतिसाद दिला. स्वतः १०० किलो, मैत्रिणींकडे मिळून १०० किलो, असे एकूण २०० किलो गांडुळांचे उत्पादन घेतल्याचे देसरडा यांनी सांगितले.

सध्याच्या दुष्काळी परिस्थितीत शेतकऱ्यांना येत्या खरिपात जमीन सुपीकतेसाठी आधार मिळावा म्हणून ते आणि त्यांचे सहकारी शेतकऱ्यांना गांडूळ मोफत देणार आहेत. चाळीस वर्षांपासून या विषयात काम करीत अाहे, अशी माहिती देसरडा यांनी यावेळी दिली.