हिंगोली : महाकृषी ऊर्जा अभियानअंतर्गंत हिंगोली जिल्ह्यातील ३६ हजार ७०६ शेतकऱ्यांनी २५ कोटी ७ लाख रुपये, तर परभणी जिल्ह्यातील ४१ हजार ९१३ शेतकऱ्यांनी २५ कोटी ९५ लाख रुपये थकीत वीज देयकाचा भरणा केला आहे. एकूण ७८ हजार ६१९ शेतकऱ्यांनी ५१ कोटी २ लाख रुपये भरले आहेत.

हिंगोली जिल्ह्यातील ८७३ आणि परभणी जिल्ह्यातील ९५९  शेतकऱ्यांनी संपूर्ण थकबाकी भरली आहे. ५० टक्के वीजबिल माफीसाठी केवळ २८ दिवस उरले आहेत. या योजनेचा शेतकऱ्यांनी लाभ घ्यावा, असे आवाहन महावितरणतर्फे करण्यात आले. 

राज्याच्या कृषिपंप वीजजोडणी धोरण २०२० नुसार कृषिपंपांच्या वर्षानुवर्षे थकीत वीजबिलांमधून थकबाकीमुक्त होण्यासाठी थकबाकीच्या ५० टक्के रक्कम व पूर्ण चालू वीजबिल येत्या ३१ मार्चपर्यंत भरल्यास उर्वरित संपूर्ण थकबाकीची रक्कम माफ करण्यात येत आहे. येत्या ३१ मार्चला ५० टक्के माफीची मुदत संपेल.

एप्रिलपासून बिलात फक्त ३० टक्के माफी मिळेल. या योजनेचा लाभ घेऊन उर्वरित शेतकऱ्यांनी त्यांची बिले भरली, तर शेतकऱ्यांना अखंडित व पुरेशा दाबाने वीज देणे शक्य होईल. या शिवाय नवीन शेतकऱ्यांना तातडीने वीज जोडण्याही उपलब्ध होतील. त्यामुळे शेतकऱ्यांनी थकबाकी भरून  कृषिपंपाचा वीजपुरवठा अबाधित ठेवावा, असे आवाहन मुख्य अभियंता दत्तात्रेय पडळकर यांनी केले.