मुंगळा जि. वाशीम ः चांगल्या पावसामुळे यंदा या भागातील खरीप पिके जोमाने बहरली आहेत. मूग, उडदाच्या झाडांवर शेंगा लागल्या असून रानडुकरे आता या पिकांचे अतोनात नुकसान करू लागले आहेत. याकडे तातडीने वनविभागाने लक्ष देण्याची मागणी शेतकऱ्यांनी केली आहे.

यावर्षी पाऊस वेळेवर सुरू झाल्याने शेतकऱ्यांनी सुरुवातीलाच पेरणी केली. काही शेतकऱ्यांना निकृष्ट बियाण्यामुळे दुबार, तिबार पेरणी करावी लागली. आता या शेतशिवारात मूग, उडीद, सोयाबीन, तूर, ज्वारी अशी सर्वच पिके कमी अधिक प्रमाणात वाढू लागली आहेत. मात्र, वन विभागाच्या निष्काळजीपणामुळे शेतकऱ्यांसमोर रानटी जनावरांचे मोठे संकट तयार झालेले आहे.

मुंगळा परिसरातील शेतीला लागून तीन बाजूंना जंगल आहे. या जंगलामध्ये अनेक रानडुक्कर, रोही, हरीण, माकड हे प्राणी मोठ्या प्रमाणात आहेत. हे प्राणी शेतातील पिकांची दरवर्षी नासाडी करतात. शेतकऱ्यांना लाखो रुपयांचे नुकसान सहन करावे लागते. नुकसानग्रस्त शेतकऱ्यांनी अनेकवेळा महसूल अधिकारी, वन विभागाकडे वारंवार तक्रारी केल्या. परंतु अद्यापपर्यंत संबंधित विभागाने कुठलीही कारवाई केली नाही.

शेतकऱ्यांना आपले पीक वाचविण्यासाठी शेतकऱ्यांना रात्री पिकाची राखण करावी लागते.  यंदाही हा त्रास सुरू झाला. दोन दिवसांपूर्वी येथील भगवान सोनुने यांच्या मूग, उडीद पिकात रानडुक्करांनी नासधूस केली. शेंगा खाऊन पिकाचे नुकसान केले. त्यामुळे हातातोंडाशी आलेला घास हिरावला आहे. वनविभागाने नुकसान भरपाई द्यावी, अशी मागणी मुंगळा येथील शेतकऱ्यांनी केली आहे.