सिंधुदुर्ग ः जिल्ह्याच्या काही भागात पावसाचा जोर कायम आहे. त्यामुळे त्याठिकाणी पूरस्थिती कायम असून वेंगुर्ला होडावडा येथील एका घरात पुराचे पाणी शिरल्यामुळे त्या कुटुंबातील पाच सदस्यांना सुरक्षित स्थळी हलविले आहे. संततधारेमुळे जिल्ह्यातील भिजवणी आणि हळवी भातपिकांचे मोठे नुकसान झाले आहे.

जिल्ह्यात सोमवारी पहाटेपासून मुसळधार पाऊस सुरू आहे. मंगळवारी रात्रभर जिल्ह्यातील वैभववाडी, मालवण, वेंगुर्ला, सांवतवाडी, देवगड या तालुक्यांमध्ये मुसळधार पाऊस झाला. मुसळधार पावसामुळे जनजीवन विस्कळीत झाले. वेंगुर्ला तालुक्यात पावसाचा जोर कायम आहे. सलग चौथ्या दिवशी या तालुक्यात मुसळधार पाऊस सुरू असल्यामुळे काही भागात पूरस्थिती निर्माण झाली आहे. होडावडा पुलावरून पुराचे पाणी वाहत असून होडावडा येथील मारीया आंद्रुलुईस ब्रिटो यांच्या घरात पुराचे पाणी शिरले आहे. त्यामुळे त्या कुटुंबातील मारीया यांच्यासह पीटर आंद्रुलुईज ब्रिटो, लॉरेन्स आंद्रुलुईस ब्रिटो, त्रिजा पीटर ब्रिटो, विल्यम पीटर ब्रिटो या पाच जणांना नातेवाइकांच्या घरी हलविले आहे.

होडावडा पुलानजीकच्या कित्येक एकर भातशेतीमध्ये पुराचे पाणी घुसले असून येथील शेतीचे मोठे नुकसान झाले आहे. कणकणली आणि वैभववाडी या दोन तालुक्यांतील सह्याद्री पट्ट्यात जोरदार पाऊस सुरू आहे. त्यामुळे नदीनाले दुथडी भरून वाहत आहेत.मुसळधार पावसामुळे जिल्ह्यातील कापणीला आलेली भिजवणीची भातशेती आणि हळवी भातपिकांचे नुकसान सुरू झाले आहे. हळवी भातपिके काही भागात कापणीला आली आहेत. परंतु परिपक्व झालेल्या या भातपिकांचे पावसामुळे मोठे नुकसान होण्याची शक्यता आहे.

जिल्ह्याच्या किनारपट्टीला देखील पावसाला जोर अधिक आहे. मालवणात समुद्र देखील खवळलेला आहे. त्यातच हवामान खात्याने जोरदार वारे वाहण्याची शक्यता वर्तविल्यामुळे सर्वांत सुरक्षित मानल्या गेलेल्या देवगड बंदरात शेकडो नौकांनी आश्रय घेतला आहे. दरम्यान बुधवारी दुपारी काही भागात पावसाने विश्रांती घेतल्याचे चित्र होते.