महाळुंगे पडवळ, जि. पुणे : आंबेगाव तालुक्‍यात दहा ते १२ दिवसांपासून होत असलेल्या पावसामुळे कोबी, फ्लॉवर, मेथी, कोथिंबीर आदी भाजीपाला पिकांचे नुकसान झाले आहे. त्याचा सर्वाधिक फटका लौकी, कळंब, चास, महाळुंगे पडवळ आदी गावांतील शेतकऱ्यांना बसला आहे. 

पावसामुळे सूर्यदर्शन होत नाही, तसेच दररोज कोसळत असलेल्या सरींमुळे पिकांमध्ये पाणी साचल्याने कोबी, फ्लॉवर, मिरची, टोमॅटो, मेथी, कोथिंबीर आदी पिके सडू लागली आहेत. तसेच, किडीचा उपद्रव वाढला आहे. मार्च ते एप्रिलदरम्यान टोकन पद्धतीने लागवड केलेल्या भुईमूग पिकाची काढणीची कामे रखडली आहेत. वेळेत काढणी न झाल्यास भुईमूगाच्या शेंगांना जमिनीतच मोड येण्याची शक्‍यता आहे. पाऊस जर असाच सुरू राहिला, तर भुईमूग शेंगाचे नुकसान होऊन भुईमूग पीक वाया जाण्याचा धोका आहे, असे रामचंद्र थोरात, आदिनाथ थोरात व राजाराम थोरात यांनी सांगितले. 

कळंब येथील शेतकरी संजय कानडे व आकाश  अर्जुन कानडे यांच्या एक एकर क्षेत्रातील फ्लॉवर पिकात पाणी साचत असल्याने पीक सडू लागले आहे. त्यांनी बियाणे, खते, औषधे असा एकूण पन्नास हजार रुपये खर्च केला होता. सततच्या पावसामुळे हातातोंडाशी आलेला घास या निसर्गाने हिरावून घेतला आहे. प्रशासनाने झालेल्या नुकसानीचे पंचनामे करावेत, अशी मागणी आंबेगाव तालुका पंचायत समितीच्या सभापती उषा कानडे, माजी सभापती वसंतराव भालेराव व पुणे जिल्हा राष्ट्रवादी काँग्रेसचे उपाध्यक्ष प्रमोद कानडे यांनी केली आहे.