नाशिक : जिल्ह्यात गेल्या १२ दिवसांत सरासरीच्या १०५ टक्के पाऊस झाला. मुसळधार पावसामुळे आतापर्यंत चार जणांचे बळी गेले असून, चार हजारांवर विस्थापित झालेली कुटुंबे निवारा शेडमध्ये आश्रयाला आहेत. धरण क्षेत्रात अद्यापही पाऊस सुरू असून, २७ हजारांहून अधिक क्‍युसेकने विसर्ग सुरूच आहे. पूरस्थिती थोडी कमी झाली असली, तरी प्रश्न सुटलेला नाही. या पार्श्वभूमीवर पूर कायम असलेल्या भागात नुकसानीचे पंचनामे होणे बाकी आहेत.

मुख्यमंत्री देवेंद्र फडणवीस यांच्या सूचनेनंतर बुधवार (ता. ७) पासून पूर कमी झालेल्या भागात पंचनाम्यांना सुरवात झाली. त्यामुळे बाधित झालेल्या कुणालाही निवारा शेडमधील भोजन व्यवस्था वगळता कुठल्याही प्रकारची शासकीय मदत मिळालेली नाही. अजूनही बराच भाग पाण्यात असल्याने नुकसानीचे नेमके चित्र स्पष्ट व्हायला आणखी दोन दिवस लागतील, असे अधिकाऱ्यांचे म्हणणे आहे. 

गंगापूर, दारणा आणि पालखेड अशा तिन्ही प्रमुख समूहांतील धरणालगतच्या दीडशेहून अधिक गावांना पुराचा फटका बसला आहे. नाशिक, निफाड, बागलाण, मालेगाव, पेठ या पाच तालुक्‍यांमध्ये मोठे नुकसान झाले आहे. अनेक भागांमध्ये पुरामुळे कोलमडलेली वीज व पाणीपुरवठा व्यवस्था पूर्ववत झालेली नाही. 

नांदूर मध्यमेश्‍वर धरणातून २९ हजार ५९४ क्‍युसेकने पाण्याचा विसर्ग सुरू होता. जिल्ह्यातील पूरस्थिती कायम असून, विस्थापितांच्या व्यवस्थेत व्यस्त यंत्रणेकडून अजून पूर्ण क्षमतेने पंचनामे झाले नसून, याबाबत कामकाज संथगतीने सुरू आहे.

परीक्षा पुढे ढकलल्या पशुसंवर्धन विभागातील पशुधन पर्यवेक्षक व परिचर या पदांसाठी येत्या १० ऑगस्टपासून राज्यभरात ‘महापरीक्षा’द्वारे परीक्षा पार पडणार होत्या. नाशिक जिल्ह्यात या परीक्षा १३ ऑगस्ट रोजी पार पडणार होत्या. मात्र, अतिवृष्टीमुळे राज्यातील अनेक जिल्हे पूरस्थितीशी सामना करत आहे, जनजीवन विस्कळित झाले आहे. याच पार्श्वभूमीवर महापरीक्षाचे प्रकल्प व्यवस्थापक दिनेश पाटील यांना शासनाने पत्र पाठवत नियोजित सर्व परीक्षा १९ ऑगस्टनंतर घेण्याचे आदेश दिले आहेत.

पाच तालुक्‍यांना पुराचा फटका जिल्ह्यातील पाच तालुक्‍यांना पुराचा फटका बसला आहे. त्यात निफाड दोन हजार ५२२, नाशिक ३ हजार ३९, बागलाण ३४५, मालेगाव ३६, पेठ १३ यांसह लहान-मोठ्या गावांत एकूण पाच हजार ६४० कुटुंबे बाधित झाली आहेत.