चंदीगड : हरियाना राज्यात शेतकऱ्यांना पेन्‍शन देण्यासंदर्भात अभ्यासासाठी विशेष समिती गठित करण्यात आली आहे. सदर समिती राज्यातील कृषी शास्त्रज्ञ आणि प्रगतिशील महिला शेतकऱ्यांची मते या विषयासंदर्भात जाणून घेणार आहेत.  हरियाना भाजपचे अध्यक्ष आणि तोहाना येथील आमदार सुभाष बराला हे या समितीचे अध्यक्ष आहेत. मंगळवारी (ता. २९) या समितीची तिसरी बैठक पार पडली. पुढील बैठकीत समिती राज्यातील कृषी शास्त्रज्ञ, प्रगतिशील महिला शेतकरी आदींची मते जाणून घेणार आहेत, तसेच या संदर्भातील सूचनांचा अहवालात अंतर्भाव करण्यात येणार आहे. समिती लवकरच मुख्यमंत्र्यांना आपला अहवाल सादर करणार आहे.  समितीची पहिली बैठक २७ डिसेंबर २०१८ मध्ये झाली होती, दुसरी तीन आठवड्यांपूर्वी झाली होती. समितीत अध्यक्ष श्री. बराला यांच्यासह सत्ताधारी भाजपचे आमदार अभयसिंह यादव, महिपाल धांडा, घनश्‍यामदास अरोरा आणि पवन सैनी यांचा समावेश आहे. वरिष्ठ सनदी अधिकारी, कृषी आणि शेतकरी विकास विभागाचे संचालक अजित बालाजी जोशी हेही या समितीत सदस्य आहेत. ऑक्टोबरमध्ये होणाऱ्या निवडणुकांच्या पार्श्‍वभूमीवर भाजपाला शेतकऱ्यांसाठी मोठी घोषणा करायची आहे. यापूर्वीच कॉँग्रेस, लोकदल या विरोधी पक्षांनी राज्यातील शेतकऱ्यांना कर्जमाफीचे आश्‍वासन दिले आहे. सत्ताधारी भाजप यामुळे राजकीय दबावात आहे.