पुणे : बंगालच्या उपसागरावरून होत असलेल्या बाष्पाच्या पुरवठ्यामुळे राज्यात पूर्वमोसमी पावसाला पोषक हवामान आहे. उद्यापासून (ता. २४) मध्य महाराष्ट्र, मराठवाडा, विदर्भात वादळी पावसासह गारपीट होण्याचा इशारा हवामान विभागाने दिला आहे. राज्याच्या अनेक भागांत जोरदार वारे, विजा, मेघगर्जनेसह पाऊस पडण्याचा, तर कोकणातही तुरळक ठिकाणी हलक्या पावसाचा अंदाज हवामान विभागाने वर्तविला आहे. 

गेल्या काही दिवसांपासून राज्यात पूर्वमोसमी पाऊस थांबला आहे. राज्यात मुख्यत: निरभ्र आकाश असल्याने राज्याच्या तापमानात चांगलीच वाढ होऊन उन्हाच्या झळा वाढल्या आहेत. रविवारी (ता. २२) सकाळपर्यंतच्या २४ तासांमध्ये सोलापूर येथे उच्चांकी ३७.२ अंश सेल्सिअस तापमानाची नोंद झाली. कोल्हापूर, सांगली, सातारा, सोलापूर, परभणी, नांदेड, अकोला, अमरावती, चंद्रपूर येथे तापमानाचा पारा छत्तिशी पार गेल्याने उन्हाचा चटका असह्य होत आहे. तापमानात चढ-उतार होण्याची शक्यता आहे. 

बंगालच्या उपसागरात केंद्रभागी अधिक दाब असलेली चक्राकार वाऱ्यांची स्थिती सक्रिय आहे. यामुळे गेल्या काही दिवसांपासून पूर्व आणि मध्य भारतात सातत्याने बाष्पाचा पुरवठा होत आहे. पश्चिम विदर्भापासून तमिळनाडूपर्यंत हवेचा कमी दाबाचा पट्टाही कायम आहे. यामुळे उद्यापासून (ता. २४) पावसाला पोषक हवामान होऊन वादळी वाऱ्यासह गारपीट होण्याचा इशारा देण्यात आला आहे. 

रविवारी (ता. २२) सकाळपर्यंतच्या २४ तासांमध्ये राज्यातील विविध ठिकाणचे किमाल व किमान (कंसात) तापमान (अंश सेल्सिअसमध्ये) : पुणे ३४.६ (१७.६), जळगाव ३५.० (२०.४), कोल्हापूर ३६.१ (२१.१), महाबळेश्‍वर ३१.० (१७.८), मालेगाव ३५.२ (१९.२), नाशिक ३३.१ (१७.०), निफाड ३०.० (१३.२), सांगली ३६.८ (१९.६), सातारा ३६.० (१८.३), सोलापूर ३७.२ (२०.३), अलिबाग २९.२ (२१.८), डहाणू ३१.३ (२२.४), सांताक्रूझ ३०.६ (२०.७), रत्नागिरी ३२.० (२१.२), औरंगाबाद ३४.४ (१९.९), परभणी ३६.० (१९.०), नांदेड ३७.०, अकोला ३६.९ (१८.१), अमरावती ३६.२ (१८.०), बुलडाणा ३३.५ (२१.२), चंद्रपूर ३६.५ (२०.५), गोंदिया ३१.२ (१९.२), नागपूर ३४.६(१६.२), वर्धा ३५.५ (१९.८).