नगर : दूध उत्पादक शेतकरी संघर्ष समितीच्या वतीने झालेल्या ‘लेटर टू डेअरी मिनिस्टर’ या पत्र पाठविण्याच्या मोहिमेला राज्यभर अभूतपूर्व प्रतिसाद मिळाला. दूध उत्पादक पट्ट्यातून हजारो पत्र दुग्धविकास मंत्र्यांना पाठविण्यात आली.

काही भागांतून मुख्यमंत्र्यांनाही पत्र पाठविली गेली. त्यामुळे दूध उत्पादकांच्या तीव्र भावना शासनाला पाठविल्या गेल्या असून, दूध उत्पादकांचे प्रश्‍न तातडीने सुटावेत, अशी अपेक्षा व्यक्त केली जात आहे. किसान सभेच्या वतीने राज्यातील विधान सभा व विधान परिषदेच्या सर्व आमदारांना पत्र पाठवून दूध उत्पादकांच्या मागण्या कळविण्यात आल्या. मंत्रालयात दुग्धविकास मंत्र्यांच्या कार्यालयात व दुग्धविकास विभागाच्या सचिवांच्या कार्यालयात जाऊन दूध उत्पादक शेतकरी संघर्ष समितीच्या वतीने निवेदन देण्यात आले. दुधाला एफआरपी व इतर ८ मागण्यांबाबत मंत्रालय स्तरावर काय कार्यवाही सुरू आहे याचा पाठपुरावा करण्यात येत आहे. 

आंदोलनाचा परिणाम तसेच राष्ट्रीय व आंतरराष्ट्रीय बाजारातील घडामोडींमुळे दुधाचे खरेदीदर आता काही प्रमाणात सुधारत आहेत. मात्र असे असले तरी दूध व्यवसायातील अस्थिरता दूध व्यावसायिकांना पुन्हा अडचणीत आणू शकते. दूध व्यवसायातील ही अस्थिरता लक्षात घेता संघर्ष समितीने आपला धोरणात्मक मागण्यांसाठीचा संघर्ष नेटाने सुरूच ठेवण्याचा निर्णय घेतला आहे. लवकरच संघर्ष समितीच्या राज्य समन्वय समितीची बैठक घेऊन याबाबत पुढील संघर्षाची दिशा जाहीर केली जाणार आहे, असे दूध उत्पादक शेतकरी संघर्ष समितीचे राज्य समन्वयक व किसान सभेचे नेते डॉ. अजित नवले यांनी सांगितले.