बाजार भोगाव, जि. कोल्हापूर ः गगनबावड्यातील कोदे खोरीत ४५ दिवस वास्तव्य केलेला टस्कर शुक्रवारी (ता. ९) रात्री पश्‍चिम पन्हाळ्याच्या जांभळी खोऱ्यातील गोठणे-चाफेवाडी परिसरात परतला. ऊस, भात, नाचणी पिकांचे नुकसान करीत त्याने पुनरागमनाची वर्दी दिली. परिणामी, संपूर्ण जांभळी खोरा भीतीच्या छायेखाली आला आहे.

गगनबावडा तालुक्‍यातील कोदे खोरीत टस्करने ४५ दिवसांपासून ठाण मांडल्याने किमान जांभळी खोऱ्यातील शेतकऱ्यांची ऊस, भात, नाचणी पिके हातातोंडाशी आली होती. रात्री कोदे व गोठणे दरम्यानच्या जंखणीच्या जंगलात त्याचे पुनरागमन झाले. गोठणे येथील डाकरोबा देवालयाजवळच्या खळ्यावर मळणीसाठी रचलेल्या भाताच्या गंज्या त्याने उद्‌ध्वस्त केल्या.

 खळ्याशेजारील केदार पाटील, यशवंत पाटील, विलास पाटील, भीमराव पाटील, जिजू दशवंत, बिरू लांबोर, शिवाजी आरडे आदींच्या भात, ऊस, नाचणी पिकांचे नुकसान केले. पहाटे टस्कर चाफेवाडी, मानवाडच्या जंगलाकडे गेला. दरम्यान, मानवाड वन कर्मचाऱ्यांनी वाशी, कोलीक, पडसाळी, गोठणे, पोंबरे, पिसात्री, मानवाड येथे संचलन करून सतर्कतेचे आवाहन केले. वनपाल स्मिता डाके, वनरक्षक मनीषा देसाई, आप्पासाहेब भुरटे, आशीष चाळसकर, हिंदुराव पाटील, शंकर पोवार उपस्थित होते.