नगर  ः जिल्ह्यात यंदाच्या खरिपात ६८ हजार ६२२ हेक्टर क्षेत्रावर चारा पिकांची लागवड करण्यात आली आहे, अशी माहिती कृषी विभागातून देण्यात आली. पाऊस नसल्याने क्षेत्र कमीच आहे. परतीचा पाऊस चांगला झाला तर चारा पिकांच्या क्षेत्रात वाढ होण्याची अपेक्षा व्यक्त केली जात आहे. 

जिल्ह्यात गेल्या वर्षभरात दुष्काळामुळे व पाणी उपलब्ध नसल्याने गंभीर चाराटंचाईला सामोरे जावे लागले होते. यंदा पावसाळ्यात चारा लागवड क्षेत्रात वाढ होण्याचा अंदाज व्यक्त केला जात होता. मात्र यंदाही दुष्काळग्रस्त तालुक्यांत पुरेसा पाऊस झाला नसल्याने चारा लागवडीच्या क्षेत्रात फारशी वाढ झालेली नाही.

यंदा खरिपात आत्तापर्यंत ६८ हजार सहाशे २२ हेक्टर क्षेत्रावर चारा लागवड झालेली असून त्यात ३० हजार ८४३ हेक्टर क्षेत्रावर खरीप मका, १९,२९७ हेक्टर क्षेत्रावर खरीप कडवळ, १२४ हेक्टर क्षेत्रावर बाजरी, ७, ९२३ हेक्टर क्षेत्रावर लुसर्न घास, २६९० हेक्टर क्षेत्रावर नेपीयर ग्रास, ७७४५ हेक्टर क्षेत्रावर इतर चारा पिकांची लागवड केली आहे. अजून पुरेसा पाऊस नाही. परतीचा पाऊस जर चांगला झाला चारा लागवड क्षेत्रात वाढ होण्याचा अंदाज व्यक्त केला जात आहे. 

तालुकानिहाय लागवड क्षेत्र (हेक्टर) : नगर ः ४४६४, पारनेर ः ३३४६, श्रीगोंदा ः ५४३६, कर्जत ः ६१२३, जामखेड ः ११९३, शेवगाव ः १९४१, पाथर्डी ः ३३१३, नेवासा ः ७६६२, राहुरी ः ६५७४, संगमनेर ः ११,५३०, अकोले ः १४४८, कोपरगाव ः ४२५५, श्रीरामपूर ः २७५४, राहाता ः ८५८३.