परभणी  ः दुष्काळी स्थितीमुळे जिल्ह्यात चाराटंचाई गंभीर होत चालली आहे. सध्या जिल्ह्यात राणी सावरगाव (ता. गंगाखेड) येथे एकमेव चारा छावणी सुरू आहे. यामुळे दुष्काळग्रस्त गंगाखेड तालुक्यातील पशुपालकांना दिलासा मिळाला आहे. दिवसागणिक वाढत चाललेल्या चाराटंचाईमुळे पशुपालक जनावरांची रवानगी चारा छावणीत करीत आहेत. त्यामुळे सद्यःस्थितीत या चारा छावणीतील जनावरांची संख्या १ हजार ४०७ पर्यंत वाढली आहे.

राणी सावरगाव (ता. गंगाखेड) येथील श्री छत्रपती शिवाजी गोशाळेला तालुक्यातील ३ हजारपर्यंत जनावरांसाठी चारा छावणी सुरू करण्यास जानेवारीमध्ये मंजुरी देण्यात आली. सुरवातीच्या काळात या भागात चारा उपलब्ध असल्यामुळे छावणीतील जनावरांची संख्या कमी होती, परंतु दिवसेंदिवस चारा कमी पडत असल्यामुळे छावणीत दाखल होणाऱ्या जनावरांची संख्या वाढत चालली आहे. सध्या या चारा छावणीत १ हजार ४०७ जनावरे आहेत. या चारा छावणीतील जनावरांना पशुवैद्यकीय चिकित्सालयामार्फत मोफत लसीकरण करण्यात आले.

डॉ. अजीज अन्सारी यांनी जवळपास ३५० दुधाळ जनावरांची आधार टॅगिंग केले आहे. छावणीतील १ हजार २५४ मोठ्या पशुधनास पिवळे बिल्ले, तर १५३ लहान पशुधनास लाल बिल्ले लावण्यात आले आहेत. चाऱ्याची नासाडी होऊ नये यासाठी फरशीच्या गव्हाणीची सुविधा करण्यात आली आहे. मारोतीअप्पा कोरे यांच्या विहिरीवरून पाण्याची मोफत सुविधा देण्यात आली आहे. सहायक पशुसंवर्धन आयुक्त डॉ. धोंड यांनी गुरुवारी (ता. १६) चारा छावणीस अचानक भेट देऊन पशुधन अभिलेख्याची तपासणी केली. 

डॉ. संजय पुराणिक, सहायक पशुधन आयुक्त डॉ. श्रीनिवास कारले यांनी शेतकऱ्यांना मुरघास, हायड्रोफोनिक्स चारानिर्मितीची माहिती दिली.गोशाळेत हायड्रोफोनिक प्रक्रियेद्वारे चारानिर्मितीचे उद्‌घाटन करण्यात आले. चारा छावणीचे संचालक शिवसांब कोरे यांनी चारा छावणीत निवासी राहणाऱ्या पशुपालकांसाठी दररोज तीन वेळेच्या जेवणाची व्यवस्था केली आहे, असे पशुसंवर्धन विभागाच्या सूत्रांनी सांगितले.