जळगाव : जिल्ह्यातील अनेक गावांतील शेती, पिण्याच्या पाण्यासाठी आधार असलेल्या गिरणा, हतनूर धरणातून मार्चच्या पहिल्याच आठवड्यात नदीत पाणी सोडले जावे, अशी मागणी गावांमधील सरपंच, ग्रामस्थांची आहे. 

गिरणा धरणाचे पाणी मागील १५ जानेवारी रोजी नदीत सोडण्यात आले होते. तापी नदीतून पाणीच सोडलेले नाही. गिरणातून रब्बीसाठी एकदाच आवर्तन सुटले. जानेवारीत गिरणा नदीत सोडलेले पाणी आटले आहे. नदी कोरडी पडू लागली आहे. केवळ मोठ्या खड्ड्यात  पाणी साचून राहिले आहे. तापी नदीतही मोठे डोह आटले आहेत. त्यात जळगाव तालुक्‍यातील भोकर, सावखेडा खुर्दनजीकचे सर्व डोह आटल्याने उन्हाळ्यात समस्या निर्माण होऊ शकते, अशी माहिती मिळाली.

गिरणा नदीच्या पाण्यावर लिंबू, केळीच्या बागांसह रब्बी हंगामाला लाभ मिळेल. कारण नदीकाठच्या विहिरी, कूपनलिकांचे पुनर्भरण होईल. जिल्ह्यातील चाळीसगावसह पाचोरा, भडगाव, जळगाव, धरणगाव, भुसावळ, यावल, चोपडामधील अनेक गावांचा पाणी प्रश्‍न सुटण्यास मदत होईल. गिरणा धरणातून नदीत पिण्याच्या पाण्यासाठी प्रथम ५ नोव्हेंबर, २०१८ ला पहिले आवर्तन सोडण्यात आले. तापी नदीतून शेतीसाठी पाण्याची मागणी यावल, रावेरातील शेतकरी, लोकप्रतिनिधींनी केली. परंतु त्याकडे प्रशासनाने दुर्लक्ष केले.

वाघूर धरणातूनही भुसावळ भागात पाणी सोडण्याची, पाटचारी वाढविण्याची मागणी केली जात आहे. परंतु प्रशासन उद्योग व शहरांच्या पाण्याला अधिक महत्त्व देत आहे. गिरणा धरणावर मालेगाव, चाळीसगाव, पाचोरा व भडगावच्या पिण्याच्या पाण्याचे आरक्षण आहे. वाघूरमध्ये जामनेर व जळगाव शहराला पाणीपुरवठा करावा लागतो. हतनूरवर जळगावमधील औद्योगिक वसाहत, भुसावळ शहर व काही स्थानिक उद्योगांना पाणी द्यावे लागत आहे. हे पाणी कमी पडू नये, यासाठी नदीत आवर्तन सोडण्यास प्रशासन विलंब करीत आहे, अशी शेतकऱ्यांची तक्रार आहे.