औरंगाबाद : विविध साखर कारखान्यांना घातलेल्या उसाच्या देयकं थकविल्याप्रकरणी बीड जिल्ह्यातील माजलगाव, धारूर व वडवणी तालुक्‍यातील ऊस उत्पादकांनी शुक्रवारी (ता. २९) औरंगाबादच्या प्रादेशिक सहसंचालक (साखर) कार्यालयात ठाण मांडले. जोवर थकलेल्या पैशाचा निर्णय होत नाही, तोवर न हटण्याचा निर्णय घेणारे ऊस उत्पादक सायंकाळी ५ वाजेपर्यंत कार्यालयात ठाणं मांडून होते.

बीडमधील माजलगाव तालुक्‍यातील तीन साखर कारखान्यांसह उस्मानाबाद जिल्ह्यातील एका कारखान्यांने घातलेल्या उसाचे देयक एफआरपीप्रमाणे अजून दिले नाही. याबाबत साखर सहसंचालक नीलिमा गायकवाड यांनी कारखान्यांच्या संबंधितांशी सवांद साधला. उत्पादकांना पैसे मिळावे म्हणून जो काही पाठपुरावा करता येईल तो केला. अजूनही प्रयत्न सुरूच असल्याची माहिती दिली. यावेळी लेखी आश्‍वासन दिल्यानंतर आंदोलन मागे घेण्यात आले.