कवठेमहांकाळ, जि. सांगली : तालुक्‍यात गेल्या दोन तीन महिन्यांपूर्वी झालेल्या अतिवृष्टीच्या पावसामुळे शेतकऱ्यांच्या शेती पिकाचे प्रचंड नुकसान झाले होते. दिवाळीला शेतकऱ्यांच्या खात्यावर पैसे वर्ग करणार, असे शासनाने जाहीर केले होते. मात्र दिवाळी होऊन महिना उलटत आला तरी शेतकऱ्यांच्या खात्यावर रक्कम जमा झाली नाही. तालुक्‍यातील साठ गावांपैकी केवळ १५ गावांमधील ६ हजार ४०० शेतकऱ्यांच्या खात्यावर १ कोटी ९८ लाख रुपये वर्ग झाले. उर्वरित ४५ गावांमधील ९ हजार १५२ शेतकरी अद्याप नुकसान भरपाईच्या प्रतीक्षेत आहेत.

तालुक्‍यात पावसाने जोरदार तडाखा दिला. त्यामुळे शेतकऱ्यांचे द्राक्षबागा, उसासह इतर कडधान्य पिकाचे मोठ्या प्रमाणावर नुकसान झाले. अवकाळी पावसामुळे पिकांच्या नुकसानीचे पंचनामे करण्याचे आदेश शासनाने कृषी विभाग व तलाठ्यांना दिले. तालुक्‍यात ६० गावांमधील तब्बल १५ हजार ५५२ शेतकऱ्यांचे ४ हजार ३३२ हेक्‍टरवर पंचनामे पूर्ण झाले. पंचनामे पूर्ण केल्यामुळे शेतकऱ्यांच्या मनामध्ये आशेचा किरण निर्माण झाला. पावसामुळे झालेली नुकसान भरपाई लवकर शेतकऱ्यांना मिळेल, अशी आशा वाटत होती. दिवाळीपूर्वी शेतकऱ्यांना सर्व रक्कम खात्यावर जमा करू, असे आश्वासन शासनाने दिले. मात्र दिवाळीनंतर महिना उलटला तरी अद्याप काही शेतकऱ्यांच्या खात्यावर रक्कम जमा झाली नाही.

तालुक्‍यात अतिवृष्टीच्या पावसामुळे झालेल्या शेतकऱ्यांच्या पिकांच्या नुकसान भरपाई संबंधित शेतकऱ्याच्या खात्यावर वर्ग करण्यासाठी वरिष्ठ कार्यालयाला निधीची मागणी केली आहे. अद्याप निधी उपलब्ध झाला नाही. निधी उपलब्ध झाल्यास तत्काळ शेतकऱ्यांच्या खात्यावर प्रथम वर्ग केला जाईल. बी. जे. गोरे, तहसीलदार, कवठेमहांकाळ.

तालुक्‍यातील अतिवृष्टीच्या पावसामुळे झालेल्या शेतकऱ्यांच्या नुकसानभरपाईची निधीची मागणी केली आहे लवकरच दुसऱ्या टप्प्यात निधी मिळाल्यास संबंधित शेतकऱ्यांच्या खात्यावर वर्ग होईल. - एम. जे. तोडकर तालुका कृषी अधिकारी, कवठेमहांकाळ.