अमरावती : वाण नदी प्रकल्पातील पाणी संग्रामपूर (बुलडाणा) तालुक्‍यातील लाभ क्षेत्रात असलेल्या सर्व गावांना पाइपद्वारे शेतीकामी पाणी मिळावे, अशी मागणी वरवट बकाल येथील शेतकऱ्यांनी केली. संग्रामपूर तहसीलदारांना या संदर्भाने निवेदन देण्यात आले. 

निवेदनानुसार, वाण नदी प्रकल्पात सद्यःस्थितीत पाण्याची उपलब्धता आहे. पिकांची पाण्याची गरज लक्षात घेता सरकारच्या महत्त्वाकांक्षी पाइप सिंचन योजनेद्वारे हे पाणी शेतीकामी देण्यात यावे. ज्या शेतकऱ्यांना कर्जमाफीचा लाभ मिळाला नाही. त्यांना त्वरित कर्जमाफीचा लाभ मिळावा. त्यासोबतच येत्या खरीप हंगामासाठी नवीन पीककर्ज उपलब्ध करून देण्याबाबत निर्णय व्हावा.

संग्रामपूर तालुक्‍यात दुष्काळी परिस्थिती असल्याने त्या संदर्भाने असलेल्या उपाययोजनांचा लाभदेखील मिळावा, अशी मागणी आहे. या मागण्यांची पूर्तता न झाल्यास आंदोलनाचा इशारादेखील शेतकऱ्यांनी दिला. निवेदनकर्त्यांमध्ये मंगेश ढगे, विक्रम पाटील, आकाश बकाल, नंदकिशोर बकाल, दिनेश बकाल, संतोष टाकळकार, बाबुलाल दहिकर यांच्यासह इतर शेतकऱ्यांचा समावेश होता.