नाशिक : गेल्या ६ वर्षांपूर्वी अडीच एकर क्षेत्रावर ८०० झाडांची लागवड होती. तेलकट डागाचा प्रादुर्भाव व अतिवृष्टीमुळे फळगळ वाढली. त्यातच गेल्या तीन वर्षांपासून अपेक्षित उत्पादन हाती आले नाही. त्यामुळे डाळिंब बागेवर जेसीबी फिरवण्याची दुर्दैवी वेळ येथील शेतकऱ्यांवर आली आहे.  

येवला तालुक्यातील शेतकरी गजानन जिवाजीराव देशमुख यांची अडीच एकर डाळिंब बाग होती. मात्र, चालू वर्षी अतिवृष्टीसह तेलकट डागाचा फटका शेतकऱ्यांना बसला आहे. सततच्या पावसामुळे जे काही हाती आले, त्या फळांना गुणवत्ता नव्हती. तेलकट डाग अधिक असल्याने बाजार भाव मिळाला नाही.

काढणीस आलेल्या फळांची विक्री स्थानिक बाजारात कोपरगाव येथे केली. त्यास १० ते १२ रुपये प्रतिकिलो सरासरी दर मिळाला. या क्षेत्रात अवघे २०० क्रेट डाळिंब म्हणजे ४० क्विंटल माल निघाला. 

चालू वर्षीच्या हंगामात दीड लाखांवर खर्च या क्षेत्राला आला. मात्र अवघे ४० हजार उत्पन्न मिळाल्याने खर्चाचा ताळमेळ बसला नाही. त्यात उत्पादन निम्म्यावर घटल्याने खर्चही वसूल झालेला नाही. परिणामी, या ३ वर्षांपासून सततच्या नुकसानीला कंटाळून शेतकऱ्याने बागेवर जेसीबी फिरवला.

अगोदर निसर्ग चक्रीवादळात पोल्ट्रीचे पत्रे उडून मोठे नुकसान झाले. त्यामुळे लाखो रुपयांची गुंतवणूक अडचणीत आली. त्यातच आता डाळिंब बागेत खर्च करून काही हाती येत नसल्याने कठोर अंतःकरणाने बाग तोडण्याचा निर्णय घेतला. - गजानन देशमुख, शेतकरी