सोलापूर : ‘‘गेल्या वर्षीच्या दुष्काळामुळे आणि यंदा पडलेल्या अपुऱ्या पावसामुळे उत्तर सोलापूर तालुक्यात पाण्याचा गंभीर प्रश्न आहे. दुसरीकडे उजनीच्या लाभक्षेत्रात मोठ्या प्रमाणात पाऊस झाल्यामुळे उजनी धरण १०० टक्के भरले आहे. त्यामुळे तालुक्यातील वडाळा, नान्नज, बिबी दारफळ, रानमसले, गावडी दारफळ आदी गावांतील पाण्याचा प्रश्न मिटविण्यासाठी हे अतिरिक्त वाहून जाणारे पाणी सीना नदीतून शिरापूर उपसा सिंचन योजनेच्या कालव्यात सोडा,’’ अशी मागणी सोलापूर कृषी उत्पन्न बाजार समितीचे संचालक जितेंद्र साठे यांनी पालकमंत्री विजयकुमार देशमुख यांच्याकडे केली. 

उजनीचे पाणी बोगद्यामधून सीना नदीत सोडल्यामुळे ते पाणी आमच्या शिरापूर उपसा सिंचन योजनेतंर्गत दुष्काळी तालुक्यातील गावडी (दारफळ) वडाळा, रानमसले, नान्नज येथील तलाव भरून घेण्यासाठी सोडावे, जेणेकरून वडाळा मंडलातील गावांना त्याचा फायदा होईल.

दुष्काळाची दाहकता कमी करण्यास मदत होईल. त्यामुळे शासनाचा पाणीपुरवठ्यासाठी होणारा टँकरवरील कोट्यवधीचा खर्च वाचेल. त्यावरील वीजबिल ही शासनाने टंचाईमधून भरावे, जेणेकरून पाण्यासाठी होणारा पुढील खर्च वाचण्यास मदत होईल. तरी आपण शिरापूर उपसा सिंचन योजनेस अतिरिक्त असलेले उजनीचे पाणी सोडण्याबाबत संबंधितांना आदेश द्यावा, अशी मागणी निवेदनातून करण्यात आली आहे.