नगर  : जिल्ह्याच्या बहुतांश भागात गेल्या काही दिवसांपासून सतत पाऊस पडत आहे. त्यामुळे खरिपाच्या पिकांचे नुकसान सुरुच आहे. सर्वाधिक फटका काढणीला आलेल्या व काढणी केलेल्या बाजरीला बसत आहे. भुईमुग, सोयाबीनचेही नुकसान होत आहे. अजून कापसाला धोका झाला नसला तरी त्याचीही पिवळा पडून पातेगळ, पाणगळ होण्याची भिती आहे. त्यामुळे शेतकऱ्यांमध्ये चिंता आहे. 

जिल्ह्यात यंदा खरिपाची ६ लाख १७ हजार ६९८ हेक्टरवर पेरणी झाली. त्यात सर्वाधिक बाजरीची १ लाख ४५ हजार, तर सोयाबीनची ९२ हजार हेक्टरवर पेरणी झाली. पावसामुळे पिके जोमात आली. सध्या जिल्ह्यातील बहूतांश भागात बाजरीची काढणी सुरु आहे.

गेल्या आठ दिवसांपासून सतत पाऊस पडत आहे. बाजरीचे मात्र काढणीत नुकसान होत आहे. अनेक भागात बाजरी काढणी करुन लगेच काटणी केली जात आहे. तरी काही ठिकाणी कणसांना कोंब फुटत आहेत. काही भागात खरीप भूईमुग काढणीला आला आहे. मात्र, पाऊस सुरु असल्याने त्यालाही फटका बसत आहे.  

अनेक अडचणी येऊनही यंदा सोयाबीनचे क्षेत्र वाढले. पावसाचा सोयाबीनलाही फटका बसत असून काही ठिकाणी शेंगा जागेवर सडु लागल्या आहेत. यंदा जिल्ह्यात कापसाचे एक लाख १४ हजार हेक्टर क्षेत्र आहे. यंदा कापूस पीक चांगले असून दोड्या आल्या आहेत. यंदा वाढ चांगली झालेली असल्याने पात्याची संख्याही चांगली आहे. 

शेतकऱ्यांची नुकसान भरपाईची मागणी 

जिल्ह्यातील राहुरी, राहाता, कोपरगाव, संगमनेर, अकोले, नगर, पारनरे, नेवासा, शेवगाव तालुक्यात गेल्या पंधरा दिवसांपासून सततच्या पावसाने पिकांचे नुकसान होत आहे. आठ दिवसांपुर्वी अनेक भागात वादळी पावसाने पिकांसह ऊस, भाजीपाल्याचे नुकसान केले. पंचनामे केल जात असल्याचे प्रशासनाकडून सांगितले जात आहे. मात्र नुकसानीची सरसकट भरपाई द्यावी, अशी मागणी होत आहे.