जालना : एकाच दिवशी शेतकऱ्यांना थेट बांधावर खत पोहच करण्याच्या उपक्रमांतर्गत गुरुवारी (ता.४) जिल्ह्यातील ६८८ गटांतर्फे १२३५० शेतकऱ्यांना १०.८८ कोटी रुपयांची ६२४५ मेट्रिक टन खते थेट बांधावर पोहच करण्यात आल्याची माहिती कृषी विभागाच्या वतीने देण्यात आली. 

कृषी आयुक्तालयाच्या परिपत्रकानूसार शेतकरी गटांतर्फे शेतकरी गटांतील शेतकऱ्यांच्या बांधावर रासायनिक खते उपलब्ध करून देण्याच्या सूचना प्राप्त झाल्या होत्या. त्यानुसार गुरुवारी (ता.४) ह्या मोहिमेचा प्रारंभ जालन्याचे आमदार कैलाश गोरंट्याल यांच्या हस्ते करण्यात आला. जिल्हा अधिक्षक कृषि अधिकारी बाळासाहेब शिंदे, जिल्हा गुण नियंत्रण अधिकारी एस. डी. गरंडे , अतुल लड्डा, ‘आत्मा’चे दतात्रय सूर्यवंशी यांची उपस्थिती होती. 

जिल्ह्यात शेतकऱ्यांच्या बांधावर कृषी विभाग व कृषी तंत्रज्ञान व्यवस्थापन यंत्रणा आत्मातर्फे एकाच दिवशी ५ हजार मेट्रिक टन खताच्या वितरणाची संकल्पना बाळासाहेब शिंदे यांनी मांडली. त्यानुसार गुरुवारी उपक्रम हाती घेण्यात आला. गावामध्ये खतांच्या लिंकद्वारे मागणी नोंदवून कृषी सहायक, कृषी पर्यवेक्षक, ‘आत्मा’चे तालुका तंत्रज्ञान व्यवस्थापक ,सहायक तंत्रज्ञान व्यवस्थापक , गावातील शेतकरी गट, शेतकरी उत्पादक कंपन्या , कृषी मित्रांतर्फे एका दिवसात ५ हजार मेट्रिक टन बांधावर खत वाटप मोहिमेअंतर्गत शेतकरी गटांना ५० मेट्रिक टन युरिया खताचे वाटप करण्यात आले. कोरोनाचा संसर्ग टाळण्यासाठी मास्क व सॅनिटायझरचा वापर करण्यात आला. 

जास्त खत वाटप करणाऱ्या कृषी सहायक, कृषी पर्यवेक्षक, आत्माचे सहायक तंत्रज्ञान व्यवस्थापक, तालुका तंत्रज्ञान व्यवस्थापक, शेतकरी गट /शेतकरी उत्पादक कंपनी यांच्यासाठी बक्षीसेही ठेवण्यात आली आहेत.