सांगोला : तालुक्‍यात पावसाने दांडी मारल्याने खरीप हंगाम वाया जाण्याची भीती निर्माण झाली आहे. तालुक्‍यात अवकाळी पाऊस थोड्याफार प्रमाणात झाला. रोहिणी नक्षत्राचाही एक पाऊस झाला, मात्र मृग नक्षत्रात सुसाट वारे व या वाऱ्याबरोबर धावणारे ढग यामुळे पाऊस पडेल की नाही याची शाश्‍वती नाही. या वाऱ्यामुळे जमिनीतील ओलावा कमी झाला आहे.

मृग नक्षत्राच्या पावसानंतर खरीप हंगामातील बाजरी, मटकी, हुलगा, तूर, मका, भुईमूग या पिकांची पेरणी केली जाते. पण १० दिवसांपासून पाऊस झाला नाही. यामुळे खरीप हंगामाची पेरणी लांबणीवर पडली आहे. सध्या शेतकरी पावसाची आतुरतेने वाट पाहत आहे.

खरीप पेरणीसाठी जमिनीची मशागत खते घालून जमिनी तयार केल्या आहेत. तर  बियाणे, खते, किटकनाशके विक्रेत्यांनी बियाणे व खते दुकानात आणून ठेवले आहेत. पण पावसाअभावी शेतकरी या दुकानांकडे फिरकतही नसल्याचे चित्र आहे.