नाशिक : पेठ तालुक्यात मागील महिन्यात झालेल्या मुसळधार पाऊस झाल्यानंतर घोटविहीर, लिंगवणे व त्यानंतर मोहदाड या गावातील डोंगरांना भेगा पडल्या होत्या. या पडलेल्या भेंगांमुळे नागरिकांमध्ये भीतीचे वातावरण निर्माण झाले होते. मात्र, या घाबरलेल्या नागरिकांना भूगर्भशास्त्र विभागाने दिलासा दिला आहे. सदरच्या भेगा भूकंप किंवा इतर नैसर्गिक आपत्ती नसून या परिसरात अतिवृष्टी झाल्यामुळे भेगा पडल्याचा निष्कर्ष या भूवैज्ञानिक विभागातर्फे काढण्यात आला आहे. डोंगर उतारावर असलेल्या घोटविहीर पैकी उंबरमाळ गावाच्या डोंगराला आडव्या भेगा पडल्यामुळे माळीण सारखी आपत्ती ओढवण्याच्या भीतीने नागरिकांसह प्रशासन खडबडून जागे झाले. तहसीलदार हरिष भामरे व पोलीस निरीक्षक शिवाजी बढे यांनी घटना समजल्यानंतर तत्काळ रात्रीतून उंबरमाळच्या ग्रामस्थांना नजीकच्या करंजपाडा गावात सुरक्षित स्थलांतरित केले होते. त्या पाठोपाठ लिंगवणे, रानविहीर, शिवशेत या भागातही अशाच भेगा पडल्याने हा भूकंपसदृश प्रकार असल्याच्या भीतीने पेठ तालुक्यात चिंतेचे वातावरण पसरले होते. या परिस्थितीची पाहणी करण्यासाठी विभागीय आयुक्त राजाराम माने, जिल्हाधिकारी सूरज मांढरे, उपविभागीय अधिकारी डॉ. संदीप आहेर, तहसीलदार हरीश भामरे यांनी भूवैज्ञानिक विभागाच्या अधिकाऱ्यांसह भेगा पडलेल्या भागाची पाहणी करून भेटी दिल्या होत्या.  यानंतर या पाहणीनंतर अहवाल सादर केला असून, या पडलेल्या भेगा भूकंप नसल्याचे समोर आले आहे. या भेगा अतिवृष्टीने खडकात मुरलेल्या पावसाच्या पाण्यामुळे पडल्याचा अहवाल दिला आहे. दोन बेसाल्ट जातीच्या खडकात पाणी मुरल्याने जमिनीला अशा प्रकारच्या भेगा पडत असल्याचे अहवालात स्पष्ट करण्यात आले आहे.