परभणी : पाझर तलावासाठी संपादित केलेल्या जमिनीचा मावेजा शेतकऱ्यांना देण्याकरिता संयुक्त अहवाल पाठविण्यासाठी एक लाख रुपये लाच घेताना जिल्हाधिकारी कार्यालयात उपजिल्हाधिकारी सुदर्शन गायकवाड यांना लाचलुचपत प्रतिबंधक विभागाच्या पथकाने मंगळवारी (ता. २०) सायंकाळी साडेसहाच्या सुमारास अटक केले.

पाझर तलावासाठी संपादित जमिनीचा मावेजासाठी संयुक्त अहवाल पाठविण्यास मनरेगा व सध्या भूसंपादन विभागाचा अतिरिक्त कार्यभार असलेले उपजिल्हाधिकारी सुदर्शन गायकवाड यांनी दोन लाख रुपये लाचेची मागणी केल्याची तक्रार संबंधित शेतकऱ्यांनी लाचलुचपत प्रतिबंधक विभागाकडे केली होती. परंतु एक लाख रुपये लाच देण्याबाबत तडजोड झाली.

त्यानुसार मंगळवारी (ता. २०) सायंकाळी साडेसहाच्या सुमारास लाचलुचपत प्रतिबंधक विभागाचे पोलिस उपअधीक्षक एन. एम. बेंबडे यांच्या मार्गदर्शनाखाली जिल्हाधिकारी कार्यालयात सापळा लावण्यात आला. उपजिल्हाधिकारी सुदर्शन सूर्याजी गायकवाड यांना शेतकऱ्यांकडून पंचासमक्ष एक लाख रुपये लाच घेत असताना पोलिसांनी अटक केली.