नाशिक: मागील वर्षी शेतकऱ्यांना गंभीर दुष्काळाचा सामना करावा लागला. यंदा तरी चांगला पाऊस होईल, अशी आपेक्षा बाळगणाऱ्या शेतकऱ्यांना मात्र अजूनही दिलासा मिळाला नाही. दुष्काळाचे संकट गेल्या वर्षीपासून शेतकऱ्यांच्या मानगुटीवर कायम आहे. भर पावसाळ्यात आम्हाला दुष्काळ जाणवत असल्याचे शेतकरी सांगत आहेत.  येवला तालुक्यातील अंदरसूल येथील शेतकरी रवी बनकर यांचे तर अर्थकारणच कोलमडले आहे. मागील वर्षी पाऊस कमी असल्याने येवला तालुक्यात चाऱ्याचा प्रश्‍न गंभीर झाला होता. त्यामुळे आपल्याकडील जनावरे जिवंत ठेवण्यासाठी शिल्लक असलेले भांडवल चाऱ्यासाठी खर्च केले अन जनावरे जगविली. आपल्याकडील भांडवल संपल्याने रवी बनकर हतबल झाले. खरिपाचा हंगाम तोंडावर आल्याने बियाणे अन् खतांसाठी चणचण होती. अखेर भर दुष्काळी परिस्थितीत जगवलेली जनावरे त्यांना विकावी लागली. यातून बियाणे खरेदी करून पेरणी केली. पुढे मका लागवड केल्यांनंतर मशागतीसाठी बैलजोडीची गरज भासू लागली. मात्र त्यांच्याकडे बैलजोडी उपलब्ध नसल्याने स्वतःच्या पदवीधर मुलगा प्रसाद यास कोळपणीला जुंपून मशागत करण्याची वेळ बनकर यांच्यावर आली आहे.  रवी बनकर हे एक प्रातिनिधिक उदाहरण आहे. मात्र असे अनेक शेतकरी दुष्काळी परिस्थितीमुळे आर्थिक कोंडीत सापडले असून, पैशांमुळे शेतीकाम व पेरण्यामध्ये अडचण येत आहे. चाऱ्या अभावी दूधधंदा अडचणीत सापडला आहे. चाऱ्याचे भावही दुप्पट झाले. जिल्हा बँकेची मंदावलेली कार्यपद्धती त्यात शेतीमालाला नसलेला भाव त्यामुळे दागिने गहाण ठेवून सावकारी पैसे घेणे, जनावरे विकून भांडवल उभे करण्याची वेळ शेतकऱ्यांवर आली आहे. त्यामुळे पाऊस जरी पडत असला तरी या भर पावसाळ्यात आम्हाला दुष्काळ जाणवत असल्याची शेतकऱ्यांची प्रतिक्रिया आहे.