नवी दिल्ली ः संसदेच्या कृषी विषयक स्थायी समितीची शनिवारी (ता. २७) होणारी बैठक गणसंख्येअभावी रद्द करावी लागली. बैठकीला २९ पैकी केवळ सहाच खासदार उपस्थित होते, २३ खासदारांनी दांडी मारली. बैठकीत शेतकऱ्यांचे आर्थिक उत्पन्न दुप्पट करण्याविषयी चर्चा होणार होती.  बैठकीला समितीचे अध्यक्ष पर्वतगौडा, प्रतापसिंग बाजवा, बी. बी. पाटील, अबू तहर खान, कैलाश सैनी, रामनाथ ठाकूर हे सहा खासदारच बैठकीला उपस्थित होते.   बैठकीला उपस्‍थित असलेले एक सदस्य म्हणाले, ‘‘शेतकऱ्यांचे आर्थिक उत्‍पन्न दुप्पट करण्याच्या विषयावर होणारी ही महत्त्वाची बैठक पुरेशा गणसंख्येअभावी रद्द करावी लागल्यामुळे मी नाराज आहे. या बैठकीसाठी मी खास दिल्लीला आलो होतो.’’ पंतप्रधान मोदी यांनी तीन कृषी कायदे माघारी घेण्याचे जाहीर केले होते. कॅबिनेटमध्ये त्यावर शिक्कामोर्तबही झाले होते. त्या पार्श्‍वभूमीवर संसदेच्या या कृषी विषयक स्थायी समितीच्या बैठकीला विशेष महत्त्व होते.