बीड : पूर्वी तीन वर्षांचा करार आता पाच वर्षांचा केला. तो करार रद्द करून तीन वर्षांचा करार झाल्याशिवाय हातात कोयता घेऊ नका, असे आवाहन शिवस्मारक समितीचे अध्यक्ष तथा शिवसंग्रामचे संस्थापक अध्यक्ष विनायक मेटे यांनी केले. शिवसंग्रामचा ऊसतोड मजूर मेळावा शुक्रवारी (ता. २८) पाडळशिंगी (ता. गेवराई) येथे झाला.

श्री. मेटे म्हणाले, की ऊसतोडणीसाठी यंत्राला मिळणाऱ्या प्रतिटन ४०० रुपये भाव मजुरांनाही मिळावा. तसेच मुकादमांचे कमिशन ३६ टक्के करावे. हंगामी वसतिगृहासाठी प्रत्येक वर्षी प्रत्येक जिल्ह्यात १५ कोटी रुपये खर्च होतात. त्याऐवजी ऊसतोड मजुरांच्या पाल्यांसाठी प्रत्येक तालुक्यात कायमस्वरूपी वसतिगृह उभारावे; तसेच मजुरांचा विमा उतरावा. ऊसतोडणी मजुरांसाठी शिवसंग्रामच्या संघटनेची घोषणा करून प्रश्न सोडविण्यासाठी पुढाकार घेऊ. मेळाव्याला ऊसतोड मजूर व मुकादमांची मोठी उपस्थिती होती.