सांगली ः केशरी शिधापत्रिका (बिगर प्राधान्य गट) धारकांना जे अन्न सुरक्षा यादी समाविष्ट नाहीत त्यांना शासनाने प्रति व्यक्ती ३ किलो गहू (८ रुपये प्रति किलो दराने) व प्रति व्यक्ती २ किलो तांदूळ (१२ रुपये प्रति किलो दराने) धान्य, माहे मे व जून महिन्यासाठी उपलब्ध करून दिलेले आहे. एकूण २ लाख १८ हजार ५३४ केशरी शिधापत्रिकांपैकी १ लाख ५२ हजार १६९ इतक्‍या शिधापत्रिकाधारकांनी धान्याचा लाभ घेतला आहे, अशी माहिती जिल्हा पुरवठा अधिकारी वसुंधरा बारवे यांनी दिली. 

जिल्हा पुरवठा अधिकारी बारवे म्हणाल्या की, ग्रामीण भागात ६३ ते ८९ टक्‍के व शहरी भागात ५७ ते ६० टक्‍के कार्ड धारकांना धान्य वाटप करण्यात आले आहे. अद्याप ६६,३६५ केसरी कार्ड धारकांनी धान्य नेलेले नाही त्यांनी ९ मे पर्यंत धान्य घेऊन जावे. जून महिन्यासाठी २५ मे पासून केशरी शिधापत्रिका धारकांना धान्य वाटप करण्यास सुरुवात करण्यात येणार आहे. माहे मे महिन्यासाठी प्राधान्य कुटुंब लाभार्थी व अंत्योदय अन्न योजनेतील लाभार्थी यांचे नियमित धान्य वाटप पॉस मशीनद्वारे ५ मे पासून सुरू झालेले आहे. पहिल्या दोन दिवसांत ९० हजार कार्डधारकांनी धान्याचा लाभ घेतलेला आहे. 

पंतप्रधान गरीब कल्याण योजनेअंतर्गत अंत्योदय व प्राधान्य कुटुंब लाभार्थी यांना प्रति कार्ड १ किलो मोफत तूर डाळ किंवा चणाडाळ एप्रिल, मे व जून महिन्यासाठी देणार असल्याचे शासनाने जाहीर केलेले आहे. डाळी प्राप्त होताच त्याचे वाटप मोफत तांदळासोबत करण्यात येणार आहे.