औरंगाबाद : कोरोना संकटामुळे शेतकरी ते ग्राहक थेट शेतमाल विक्रीची संकल्पना पुढे आली. २९ मार्चपासून थेट विक्री आजअखेर दहा कोटींच्या उंबरठ्यावर येऊन ठेपली असल्याची माहिती कृषी विभागाच्या वतीने देण्यात आली. शेतकऱ्यांनी आपला शेतमाल थेट ग्राहकांना विकावा म्हणून शेतकरी आठवडे बाजाराची संकल्पना पुढे आली. त्या आठवडे बाजारात औरंगाबाद जिल्ह्यातील जवळपास १८ ते २० शेतकरी गटांनी व काही शेतकऱ्यांनी प्रतिसाद देत जवळपास चार वर्षांपासून शेतमाल थेट ग्राहकांना विकला आहे. कोरोना संकटाच्या पार्श्वभूमीवर पुरवठा साखळी विस्कळीत झाल्याने भाजीपाला व फळांची थेट विक्री करण्याची संकल्पना पुढे आली. कृषी विभागासह आत्मा व महसूल, सहकार, पोलिस आदी विभागांच्या समन्वयातून २९ मार्चला औरंगाबाद शहरात थेट विक्री सुरू झाली. सुरुवातीला जवळपास २१ शेतकरी गट व शेतकऱ्यांनी फळे, भाजीपाल्यासह धान्याची थेट ग्राहकांना विक्री करण्याची तयारी दाखविली. आता विविध शेतकरी गट, शेतकरी, शेतकरी उत्पादक कंपनी आदी मिळून जवळपास ७७ वर संख्या पोचली आहे. औरंगाबाद शहरात होत असलेली विक्री आता तालुका स्तरावर व ग्रामीण भागातील महत्त्वांच्या छोट्या मोठ्या गावांत पोचली आहे. 

ग्राहकांना मोठी विक्री थेट विक्री साखळीतून आत्तापर्यंत ६९ लाख ६९ हजार सातशे पाच किलो भाजीपाला तर ४० लाख ४५ हजार २७६ किलो फळांची औरंगाबाद जिल्ह्यातील विविध गाव व शहरातील ग्राहकांना थेट विक्री करण्यात आली आहे. या थेट फळे भाजीपाला विक्रीतून झालेली उलाढाल आजच्या घडीला ९ कोटी ९७ लाख ५४ हजार ६५५ रुपयांवर पोचली असल्याची माहिती कृषी विभागाकडून देण्यात आली.