पुणे: राज्याच्या निविष्ठा व गुणनियंत्रण संचालकपदी दिलीप झेंडे यांची नियुक्ती झाली आहे. कायमस्वरूपी संचालकपदाच्या पदोन्नती प्रक्रिया अपूर्ण आहेत. त्यामुळे झेंडे यांच्याकडे अतिरिक्त पदभार देण्यात आला आहे.  आधीचे गुणनियंत्रण संचालक विजयकुमार घावटे निवृत्त झाल्याने या पदासाठी प्रचंड चुरस होती. कृषी खात्यातील अत्यंत अभ्यासू तसेच सर्व विभागांची बारकाईने माहिती असलेला अधिकारी म्हणून श्री. झेंडे परिचित आहेत. राज्य लोकसेवा आयोगाच्या परीक्षेत ते राज्यात सर्व प्रथम आल्यानंतर त्यांची पहिली नियुक्ती कृषी आयुक्तालयाच्या फलोत्पादन विभागात पीक संरक्षण अधिकारी म्हणून झाली.  महात्मा फुले राहुरी कृषी विद्यापीठातून कीटकशास्त्र विषयात पदव्युत्तर शिक्षण घेतलेल्या झेंडे यांनी कृषी खात्यात २९ वर्षे सेवा केली आहे. राज्याच्या बियाणे, खते व कीटकनाशके उद्योगातील प्रशासकीय तसेच तांत्रिक घडामोडींचा त्यांचा दांडगा अभ्यास आहे. सध्या पुणे कृषी सहसंचालकपदी कार्यरत असलेल्या झेंडे यांनी खात्यांतर्गत अनेक महत्वाच्या पदांवर कामे केली आहेत.  कृषी आयुक्तालयात अतिशय महत्वाच्या राज्य गुणवत्ता नियंत्रण अधिकारिपदी झेंडे यांनी चार वर्षे उत्तम काम केले. याच कालावधीत त्यांनी बियाणे, खते, कीटकनाशके उद्योगाशी संबंधित यंत्रणांची तांत्रिक घडी बसवली.  पुढे फलोत्पादन अभियानात प्रकल्प व्यवस्थापक आणि त्यानंतर पुण्याचे कृषी सहसंचालक म्हणून झेंडे यांनी उत्तम कामगिरी बजावली. सध्या शासनाने त्यांना प्रक्रिया व नियोजन संचालकपदाचा देखील जादा पदभार दिला आहे.