नाशिक: कांदा साठा मर्यादा घालून दिल्याने व्यापाऱ्यांना अडचणी येत आहेत. त्यामुळे कांदा खरेदीवर परिणाम होत असून त्याचा फटका शेतकऱ्यांना बसत आहे. या पार्श्वभूमीवर कोंडी सोडवण्यासाठी साठवणूक मर्यादा वाढवून द्या, अशी मागणी खासदार डॉ. भारती पवार यांनी केंद्रीय ग्राहक संरक्षण आणि नागरीपुरवठा राज्यमंत्री रावसाहेब दानवे यांच्याकडे केली.  याबाबत खासदार पवार यांनी मंत्री दानवे यांची बुधवारी (ता.२८) भेट घेऊन निवेदन दिले. त्यांनी निवेदनात म्हटले आहे, की जिल्ह्यात कांदा खरेदी बंद झाल्याने शेतकरीवर्ग कोंडीत सापडला आहे. कांदा व्यापारी व शेतकरी यांचा कांदा खराब होऊ नये म्हणून तातडीने पुढच्या दहा दिवसांची मुदत देऊन विक्रीसाठी त्यांना परवानगी द्यावी. तसेच कांदा साठवणूक क्षमताही वाढवून देण्याचा सकारात्मक निर्णय घ्यावा.  लवकरच व्यापारी वर्गाशी चर्चा करून सुवर्णमध्य काढू, असे आश्वासन केंद्रीय मंत्री दानवे यांनी दिल्याचे डॉ. पवार यांनी सांगितले. चंद्रकांत पाटलांचे वाणिज्य मंत्र्यांना पत्र घाऊक व्यापाऱ्यांची साठवणूक मर्यादा मर्यादा २५ टनांवरून १०० टन तर किरकोळ व्यापाऱ्यांना २ टनांवरून १०  करावी, अशी मागणी भाजप प्रदेशाध्यक्ष चंद्रकांत पाटील यांनी केंद्रीय वाणिज्य व उद्योग मंत्री पियुष गोयल यांच्याकडे केली आहे. कांदा उत्पादक शेतकरी आणि व्यापारी दोघांनाही लवकरच दिलासा मिळावा यासाठी केंद्र सरकार त्वरित सकारात्मक पाऊल उचलेल, असा मला विश्वास असल्याचे त्यांनी म्हटले आहे.